Ulaanbaatar
Хятадад хүнд суртал, чирэгдлийг арилгахад чиглэсэн журам гаргажээ
ДЭЛХИЙН МЭДЭЭ | УЛС ТӨР
БЭЭЖИН, 2025 оны наймдугаар сарын 7 /Xinhua/. БНХАУ-д лхагва гарагт гарсан шинэ журмын дагуу албаны хүмүүст цөөн хурал хийх, богино илтгэл тавих, товч бичиг баримт бүрдүүлэх, хяналт шалгалтыг багасгах үүрэг өгчээ.
Доод шатны албан
тушаалтнуудыг хүнд суртал, утга учиргүй албархуу байдлаас ангижруулах, доод
шатны ачааллыг бууруулах урт хугацааны механизмыг боловсронгуй болгох зорилгоор
Хятадын Коммунист намын Төв хороо, Төрийн Зөвлөлийн ерөнхий газруудаас уг
журмыг гаргасан байна.
Баримт бичгийн
тоо хэмжээг хянахад чиглэсэн арга хэмжээний хувьд аливаа хэлтсээс жил бүр гаргах
албан баримт бичгийн нийт хэмжээг нэмэгдүүлэхгүйгээр зөвхөн цөөрүүлэх, өмнөх
оны баримт бичгийн хэмжээнээс хэтэрсэн хэлтсүүд үндэслэлээ бичгээр гаргаж
өгөхийг журамд заажээ.
Мөн албан тушаалтнууд
гол санааг оновчтой тусгаж, бодлогын тодорхой арга хэмжээг онцолсон,
төвлөрсөн, бодитой, шинэлэг баримт бичиг боловсруулах шаардлагатай байна. Зарим
дэлгэрэнгүй баримт бичгээс бусад тохиолдолд орон нутгийн болон хэлтсийн баримт
бичиг нь ерөнхийдөө 5000 тэмдэгтээс хэтрэхгүй байх ёстой бөгөөд тусгай даалгавартай холбоотой баримт бичиг нь журмын дагуу 4000 тэмдэгтээс хэтрэхгүй
байх ёстой.
Уулзалтын хувьд
жил тутмын
хуралдааныг салбар тус бүрээр хязгаарлах ёстой. Хэлтсийн хурлыг боломжтой бол
нэгтгэж, шаардлагатай үед хялбарчлах хэрэгтэй байна. Мөн уг журамд хот суурин,
хороолол, тосгодоос намын гишүүд болон төрийн албан хаагчдын оролцох
шаардлагатай уулзалтуудыг үлэмж хэмжээгээр бууруулахыг тусгажээ. Түүнчлэн намын
гишүүд, төрийн албан хаагчид нэг цагаас илүү үг хэлэх ёсгүй. Хэлэлцүүлэгт
суурилсан уулзалтууд нэг өдөр хагасын дотор дуусах ёстой бол бусад уулзалт ерөнхийдөө
хагас өдрөөс хэтрэхгүй байх ёстой байна.
Мөн телеконференц эсвэл дүрс бичлэгээр дамжуулан хийх цахим уулзалтуудыг биечлэн уулзахаас дээгүүр авч үзэх ёстой. Уг журамд төрийн үйлчилгээний аппликейшнүүдийг хөгжүүлэх, ашиглах зааврыг ч мөн тусгажээ. Олон нийтийн гомдлын тухайд, доод шатны өргөдлийн ажлыг зөвхөн өргөдлийн тоо хэмжээний статистик мэдээллээр үнэлэх ёсгүй гэдгийг журамд тэмдэглэсэн байна.
