Ulaanbaatar
Ж.Байден болон 17 улсын удирдагчид барьцаанд байгаа хүмүүсийг суллахыг ХАМАС-аас шаарджээ
ДЭЛХИЙН МЭДЭЭ | УЛС ТӨР
ВАШИНГТОН, 2024
оны дөрөвдүгээр сарын 26 /VOA/. Палестины ХАМАС бүлэглэлийн барьцаанд байгаа хүмүүсийг суллахыг АНУ-ын
Ерөнхийлөгч Жо Байден болон 17 улсын удирдагчид пүрэв гарагт уриаллаа.
Газын зурваст барьцаанд байгаа хүмүүс болон энгийн иргэдийн хувь заяа олон улсын хууль тогтоомжийн дагуу хамгаалагдаж байгааг удирдагчид хамтарсан мэдэгдэлдээ онцолсон байна.
“Бид ард иргэдээ эх оронд нь авчрахын тулд зуучлагчдын гаргаж буй хүчин чармайлтыг тууштай дэмжиж байна. Барьцаалагдсан хүмүүсийг суллахыг бид ХАМАС-т дахин уриалахын сацуу бүс нутагт энх тайван, тогтвортой байдлыг хангахад хамтын хүчин чармайлтыг төвлөрүүлэхийн тулд энэ хямралыг зогсоохыг уриалж байна” гэж мэдэгдэлд дурджээ.
Энэхүү мэдэгдлийг
Ж.Байден болон Аргентин, Австри, Бразил, Болгар, Канад, Колумби, Дани, Франц,
Герман, Унгар, Польш, Португал, Румын, Серби, Испани, Тайланд, Их Британийн
удирдагчид гаргасан байна. Газын зурваст барьцаалагдсан хүмүүсийн дунд эдгээр улсын иргэд
байгаа юм.
Өнгөрсөн намар
Израилын талтай дайтаж эхэлснээс хойш ХАМАС бүлэглэлийнхэн Газын зурваст 130
гаруй хүнийг барьцаанд байлгаж байгаа гэж үзэж байгаагийн дунд Америкийн таван иргэн байгаа юм. 2023 оны 10 дугаар сарын 7-нд тус бүлэглэл Израил руу
гэнэтийн дайралт хийж, 1200 орчим хүний амь насыг авч одсоны улмаас дайн дэгдсэн юм. Тухайн
үед 240 гаруй хүнийг барьцаалсан бөгөөд 100 гаруйг нь суллажээ.
Ж.Байдены засаг захиргаа барьцаанд байгаа хүмүүсийг суллах боломжийг бүрдүүлэхийн тулд түр гал зогсоохоор олон сарын турш ажиллаж байгаа боловч дорвитой ахиц дэвшил гараагүй байна. ХАМАС гал зогсоох хэлэлцээрийг хүлээн авахаас татгалзаж байгаагийн улмаас мухардалд орсон хэвээр байна.
