Ulaanbaatar
УИХ-ын дарга М.Энхболд Өвөрхангай аймагт хүрэлцэн ирлээ
МОНГОЛЫН МЭДЭЭ | УЛС ТӨРУИХ-ын дарга М.Энхболд дагалдан ажиллаж буй УИХ, Засгийн газрын гишүүд, албаны хүмүүсийн хамтаар өнөөдөр Өвөрхангай аймгийн Арвайхээр суманд ажиллаж байна.
Улсын Их Хурлын даргыг Зэвсэгт хүчний 256 дугаар ангийн хүндэт харуул Аюуш баатарын талбайд ёслол төгөлдөр угтан авч хүндэтгэл үзүүлэв. Аймгийн удирдлагууд болон иргэд, хөдөлмөрчдийн төлөөлөл байлцсан юм.
Үргэлжлүүлэн Өвөрхангай аймгийн иргэд, хөдөлмөрчидтэй Улсын Их Хурлын дарга уулзалт зохион байгуулж, Анхдугаар болон ээлжит чуулганаар батлагдсан хууль, тогтоомжийн талаар танилцуулж, эдийн засгийн нөхцөл байдлын талаар ярилцан, хүндрэлийг даван туулах чиглэлээр хийж хэрэгжүүлэхээр төлөвлөж буй ажлуудын талаар мэдээлэл өгнө.
Уулзалтад Улсын Их Хурлын гишүүн, Засгийн газрын гишүүн, Хөдөлмөр, нийгмийн хамгааллын сайд Н.Номтойбаяр, Улсын Их Хурлын гишүүн М.Билэгт, Г.Занданшатар, Д.Тогтохсүрэн, Я.Содбаатар, С.Чинзориг, Л.Элдэв-Очир, Засгийн газрын гишүүн, Эрүүл мэндийн сайд А.Цогцэцэг, Уул уурхайн дэд сайд Х.Бадамсүрэн болон албаны бусад хүмүүс оролцож байна хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.
