Улаанбаатар, 2023 оны аравдугаар сарын 9 /МОНЦАМЭ/.  Төрийн соёрхолт, найруулагч Н.Наранбаатарын нэрэмжит театрын нээлт Булган аймгийн Хөгжимт жүжгийн театрт энэ сарын 6-нд боллоо.

Булган аймгийн ИТХ-ын XVI хуралдааны шийдвэрээр тус аймгийн Хөгжимт жүжгийн театрыг Монгол Улсын Төрийн соёрхолт, Урлагийн гавьяат зүтгэлтэн, орчин цагийн театрын урлагийн нэрт зүтгэлтэн, Булган аймгийн Хутаг-Өндөр сумын уугуул Намнангийн Наранбаатарын нэрэмжит болгож, тогтоолыг аймгийн ИТХ-ын дарга Д.Эрдэнэбат 2023 оны 7 сарын 23-нд гардуулсан юм. 

Төрийн соёрхолт, Урлагийн гавьяат зүтгэлтэн Н.Наранбаатар үндэсний болон сонгодог, орчин үеийн 50 гаруй жүжиг, 20 гаруй концерт, уран бүтээлийн тайлан тоглолтуудыг найруулж, 10 гаруй олон улсын наадамд оролцон, 20 гаруй жүжгийн гол ба туслах дүрүүдийг бүтээн, Монгол Улсын төрийн наадмын нээлт, хаалтын үйл ажиллагааг дөрвөн удаа, тэгш ойн баярыг таван удаа найруулж, дэлгэцийн 10 гаруй бүтээлийг үзэгч түмний хүртээл болгосон юм. Мөн Монголын тайз, дэлгэцийн мэргэжлийн боловсон хүчний нөөц бэлтгэх ажилд өөрийн хувь нэмрээ оруулж, СУИС-ийн Театрын урлагийн сургуульд мастер багш, зөвлөх профессороор ажиллаж 100 гаруй мэргэжлийн жүжигчнийг бэлтгэн төгсгөсөн. Түүнд 2013 онд Монгол Улсын Төрийн шагнал, 2021 онд Монгол Улсын Урлагийн гавьяат зүтгэлтэн цол хүртээсэн билээ. 

“Булганхангай нутгийн урлаг, соёлын түүхэн үргэлжлэлийг нэр хүндтэй өргөж яваа Н.Наранбаатарын хөдөлмөр зүтгэлийг хүндэтгэн, залуу хойч үеийг урлагт дуртай, соёлтой, ухамсартай иргэн болгоход онцгой нөлөөлнө” хэмээн үзэж аймгийн театрыг түүний нэрэмжит болгосноо нутгийн удирдлагууд нээлтийн үеэр онцолж байлаа.

Нээлтэд Соёлын яамны Төрийн нарийн бичгийн дарга Ч.Энх-Амгалан, СУИС-ийн Хөгжлийн хорооны дарга Ж.Эрхэмтөгс, СУИС-ийн Театр урлагийн сургуулийн захирал Д.Даваасүрэн, УГЗ, УДЭТ-ын захирал Д.Цэрэнсамбуу, Төрийн соёрхолт, Хөдөлмөрийн баатар, Ардын жүжигчин Н.Сувд, Хөдөлмөрийн баатар, Ардын жүжигчин П.Цэрэндагва, Д.Мэндбаяр, МУГЖ Б.Нармандах, Ж.Оюундарь, С.Болд-Эрдэнэ, Г.Амгаланбаатар тэргүүтэй УДЭТ-ын уран бүтээлчид, УГЗ, хөгжмийн зохиолч Б.Чинбат, “Мөрөөдлийн театр”-ын уран бүтээлчид, Цэргийн дуу бүжгийн эрдмийн чуулгын уран бүтээлчид, Хилийн цэргийн дуу бүжгийн чуулгын уран бүтээлчид зэрэг Монголын тайз, дэлгэцийн олон алдартан Булган аймагт хүрэлцэн очиж оролцсоноос гадна УДЭТ-ын уран бүтээлчид, Булган аймгийн Хөгжимт жүжгийн театрын жүжигчид хамтран Оросын алдарт зохиолч В.Красногоровын “Би ч гэсэн жаргамаар байна” уянгын драмын жүжгийг үзэгчдэд хүргэлээ. Эл уран бүтээлийг тус театрын урын санд шинээр нэмж, цаашид тогтмол тоглох боломжийг олгосон юм. Түүнчлэн энэ үеэр ирэх 2024-2025 оны хичээлийн жилд СУИС-д жүжигчин, дуучин, бүжигчин, хөгжимчин, зураач зэрэг таван мэргэжлээр Булган аймгаас оюутан элсүүлэх болсныг мэдэгдэв. Ингэснээр Булган аймгийн Хөгжимт жүжгийн театрын хүний нөөц, мэргэжлийн боловсон хүчний тулгамдсан асуудал шийдэгдэх юм.

Ташрамд дурдахад, ирэх онд Булган аймгийн Хөгжимт жүжгийн театрт Монголын цэргийн нэрт жанжин, тусгаар тогтнолын төлөө цогтой тэмцэгч, Олноо өргөгдсөн Монгол Улсын Ерөнхий сайд Ардын Хатанбаатар Магсаржав буюу Сандагдоржийн Магсаржавын тухай түүхэн жүжгийг “амилуулах”-аар болсныг нээлтийн үеэр сонордууллаа. Эл түүхэн жүжгийн зохиолыг зохиолч Б.Цогнэмэх, хөгжмийг УГЗ, хөгжмийн зохиолч Б.Чинбат бичих бол, тайзны зураачаар УГЗ, УДЭТ-ын ерөнхий зураач Т.Ганхуяг, ерөнхий найруулагчаар ОХУ-ын Театрын урлагийн академи буюу ГИТИС-ийн төгсөгч, УДЭТ-ын найруулагч М.Батболд ажиллахаар болжээ.