Ulaanbaatar
СҮХБААТАР: Газрын тос дамжуулах шугамын зассан зам дээр ноцтой осол гарчээ
ОРОН НУТГИЙН МЭДЭЭ | СҮХБААТАР
Баруун-Урт /МОНЦАМЭ/. Сар шинийн
баярын өдрүүдэд тус аймагт хүний амь эрсэдсэн зам тээврийн хоёр осол гарлаа. Нэг
нь Баруун-Урт суманд гарсан бол нөгөөх нь Халзан сумын нутаг дэвсгэрт буюу
хөдөө орон нутгийн замд гарчээ. Тодруулбал, тус аймгийн Сүхбаатар, Асгат, Халзан, Баяндэлгэр сумын нутаг дэвсгэрийг дамжин Дорнод аймгийн Матад сумаас Дорноговь аймгийн нутаг хүртэл газрын тос дамжуулах шугам байрлуулах зориулалтаар зассан шороон зам дээр хурд хэтрүүлсний улмаас хоёр машин мөргөлдөж, 32 настай жирэмсэн эмэгтэй
газар дээрээ нас баржээ.
Машинд зорчиж явсан 2-13 насны
таван хүүхэд, дөрвөн том хүн хөнгөн, хүнд хэлбэрээр бэртсэн байна. Уг осол болсон зам нь тээврийн хэрэгсэл зорчих зориулалтаар тавигдаагүй бөгөөд газрын хөрсийг тэгшлэн зассан, сул шороотой, тоосжилт ихтэй учир
тээврийн хэрэгсэл зорчих үед үзэгдэх орчин хязгаарлагдмал болдог. Иймд иргэд, жолооч та бүхэн дээрх осол гарсан энэхүү замаар буюу тээврийн хэрэгсэл зорчих зориулалтаар тавигдаагүй замаар зорчихгүй байх, хөдөө орон нутагт зорчихдоо орон нутгийн баталгаат замаар зорчих, согтуугаар тээврийн
хэрэгсэл жолоодохгүй байхыг Цагдаагийн байгууллагаас сэрэмжлүүлж байна.
Баруун-Урт суманд гарсан осол нь мөн хоёр машин мөргөлдсөнөөс үүдэлтэй бөгөөд 20 гаруй насны иргэн ослоос хойш хоёр цагийн дараа нас баржээ. Одоогоор эдгээр зам тээврийн ослуудад цагдаагийн байгууллага мөрдөн шалгах ажиллагаа явуулж байна. Мөн сар шинийн баярын өдрүүдэд тээврийн хэрэгсэл согтуугаар жолоодсон 30 гаруй зөрчлийг илрүүлжээ.
