Ulaanbaatar
ЕБС-д ажиллах тогооч нарыг мэргэшүүлж эхэллээ
МОНГОЛЫН МЭДЭЭ | БОЛОВСРОЛ
Улаанбаатар /МОНЦАМЭ/. ЕБС-ийн хоол үйлдвэрлэл үйлчилгээний тухай хууль 2020 оны есдүгээр сарын 1-ний өдрөөс хэрэгжүүлж эхэлнэ. Хуулийг хэрэгжүүлэх ажлын хүрээнд сургуулийн гал тогоонд ажиллах тогоочдын ур чадварыг дээшлүүлж, чадавхжуулах “Сургуулийн хүүхдийн хоолны тогоочийн мэргэшүүлэх сургалт”-ыг Боловсрол, шинжлэх ухааны яам, Шинжлэх ухаан, технологийн их сургуультай хамтран зохион байгуулж байна.
БШУЯ-ны Суралцагчийн хоол үйлдвэрлэлийн хэлтсийн дарга
Т.Түмэнжаргал сургалтыг нээж хэлэхдээ,
“Суралцагчдад эрүүл аюулгүй, шим тэжээллэг хоол хүнсээр үйлчилж тэдний оюуны
болон бие бялдрын өсөлт хөгжилтийг дэмжих, хооллох зөв дадал төлөвшүүлэхэд
Ерөнхий боловсролын сургуулийн хоол үйлдвэрлэл үйлчилгээний тухай хуулийн
зорилго чиглэнэ. Хуулийг хэрэгжүүлснээр 2021 оноос 1-5 дугаар анги, 2022 оноос
дунд анги, 2023 оноос ахлах ангийн сурагчдад үдийн хоолоор үйлчилнэ” гэв.
ШУТИС-ийн Үйлдвэрлэлийн
технологийн сургуулийн Хоолзүйн салбарын профессор Г.Энхтайван, “Манай улсад
1990-ээд оноос хүүхдийн хоолны дэглэм алдагдсан. Энэ нь өнөөгийн хүн амын
өвчлөлийн нэг шалтгаан болоод байна. Дэлхийн 190-ээд орон сургуулийн хүүхдийн
хоолны хуультай. Хожуу ч гэсэн манай улс ирээдүйгээ хайрласан чухал хуультай
боллоо. Хуулийг үр дүнтэй хэрэгжүүлж чадвал 10-15 жилийн дараа эрүүл саруул
биетэй залуусын үе бий болно. Хоол хүнсэндээ шинжлэх ухааны үндэслэлтэй, норм,
стандарттай хандах ёстой. Олон хүний, тэр дундаа хүүхдийн хоол хийнэ гэдэг гэр
гэртээ хоол хийдэгтэй огт адилгүй. Хүүхдийн өсөлт, хөгжилтийн хэрэгцээ,
шаардлагыг хангах хоолыг сургуулийн тогооч хийж сурах ёстой” хэмээв.
Энэ сарын 17-ноос 14 хоног үргэлжлэх тус сургалтаар хоол хүнсний илчлэгт чанар, хүүхдийн хоолны цэс зохиох, хүүхдийн
хоол бэлтгэх технологийн онцлог, хоолны илчлэг тооцох аргачлал, түүхий эд
бүтээгдэхүүний чанар, хүлээн авах, хадгалалт тээвэрлэлтэд тавигдах шаардлага
зэрэг онолын болон практик дадлагыг хослуулан нийслэлийн сургуулиудын 25
тогоочийг хамруулах юм.
Цаашид энэ чиглэлийн сургалтыг үе шаттай зохион байгуулахаар төлөвлөжээ.
