Ulaanbaatar
Сумдын өвс тэжээлийн аюулгүйн нөөцөд 342.1 тонн өвс, 111.4 тонн тэжээл байна
ОРОН НУТГИЙН МЭДЭЭ | ӨВӨРХАНГАЙ
Өвөрхангай /МОНЦМАЭ/. Засгийн газрын болон ХХААХҮЯ-ны тогтоол, шийдвэрийн дагуу 2018 оны 08 дугаар сард сумын өвс, тэжээлийн аюулгүйн нөөц бүрдүүлэхэд зориулж, сум тус бүрт 9.4-ээс 15.9 сая хүртэлх төгрөгийг олгосон. Тус ажлыг хэрхэн зохион байгуулж, ямар үр дүн гарч буй талаар аймгийн ИТХ-ын Тэргүүлэгчдийн ээлжит хуралдаанаар авч хэлэлцлээ.
Аймгийн 19 суманд нийт 289.9 сая төгрөгийн санхүүжилт хийснээс 240.5 сая төгрөгийг сумын өвс, тэжээлийн аюулгүйн нөөцийг бүрдүүлэхэд зарцуулсан байна. Үүнээс 122.1 сая төгрөгийг Төрийн сангийн дансанд буцаан төвлөрүүлжээ.
2019 оны 03 дугаар сарын 26-ны байдлаар 17 сум өвс татах тээврийн зардалдаа 46.8 сая төгрөгийг зарцуулж, одоогоор сумдын өвс тэжээлийн аюулгүйн нөөцөд 88.6 сая төгрөгийн 342.1 тонн өвс, 111.4 тонн тэжээл байгаа юм. Мөн 55.8 сая төгрөгийн өвс, тэжээлийг малчдад зээлээр олгосон дүнтэй байна.
Аймгийн өвс, тэжээлийн аюулгүйн нөөц бүрдүүлэхэд нийт 51.1 сая төгрөгийг зарцуулсан. Үүнээс аймгийн Засаг даргын а/514 дугаар захирамжаар шүлхийн голомттой, буга, аргаль зэрэг ан амьтад элбэг, хаваржилт хүндэрсэн сумдад 37.6 сая төгрөгийн өвсийг үнэгүй олгожээ.
Арвайхээр сумын шүлхий өвчний голомтод байгаа малчин өрхүүдийг өвс тэжээлээр хангах зорилгоор сумын ЗДТГ-т 11.9 сая төгрөгийн өвсийг зээлээр олгоод байна.
ИТХ-ын Тэргүүлэгчдийн хуралдаанаар сумдад тэжээлийн нөөц бүрдүүлэхээр аймгаас хуваарилсан төсвийн санхүүжилтийн зарцуулалтын нэгдсэн журамтай болох шаардлагатай гэж үзэв. Мөн олгосон санхүүжилтыг буруу, үр дүнгүй зарцуулах асуудал байгаа тул зээлийг буцаан татаж, аймагт төвлөрүүлэхийг холбогдох газарт үүрэг болголоо.
