Ulaanbaatar
Г.Чулуунбаатарыг Боловсрол, соёл, шинжлэх ухаан, спортын сайдаар томилов
МОНГОЛЫН МЭДЭЭ | УЛС ТӨР
Улаанбаатар /МОНЦАМЭ/. УИХ-ын чуулганы өнөөдрийн хуралдааны эхэнд Боловсрол, соёл, шинжлэх ухаан, спортын сайдын томилгоог хэлэлцлээ.
Ерөнхий сайд Ж.Эрдэнэбат өчигдөр академич Г.Чулуунбаатарыг Боловсрол, соёл, шинжлэх ухаан, спортын сайдаар томилуулах саналаа УИХ-ын дарга М.Энхболдод өргөн барьсан.
Үүний дараа МАН-ын бүлэг хуралдаад уг томилгоог дэмжсэн тул чуулганы өнөөдрийн хуралдаанаар хэлэлцүүлэв.
Хэлэлцүүлгийн үеэр гишүүдийн зүгээс боловсролын салбарын бодлогын асуудал дээр онцгойлон анхаарах, их дээд сургуулиудыг нийслэлээс гаргах ажлыг эхлүүлэх, бага дунд боловсролын чанарыг дээшлүүлэх, салбарын дэд бүтцийг түлхүү хөгжүүлэх зэрэг асуудлуудад ажлаа төвлөрүүлж ажиллахыг захьлаа. Ингээд түүнийг тус салбарын сайдаар томилох эсэх асуудлууд санал хураалт явуулахад олонх дэмжив.
Г.Чулуунбаатарыг томилогдсонтой холбогдуулж УИХ-ын дэд дарга Ц.Нямдорж яамны түвшинд нас тогтсон, "дөрөө даах" боловсон хүчнийг ажиллуулах хэрэгтэй хэмээсний зэрэгцээ ажлын амжилт хүслээ.
Нэр дэвшигч Г.Чулуунбаатарын намтар:
- 1975-1981 онд МУИС-ийн Философийн салбарыг философич, нийгмийн ухаан багш, судлаач мэргэжлээр бакалавр, магистрын зэрэгтэй төгссөн
- 2013 оноос одоог хүртэл Монгол Улсын ШУА-ийн Философийн хүрээлэнгийн захирал
- 2008-2013 онд Монгол Улсын Засгийн газрын хэрэгжүүлэгч агентлаг Удирдлагын академийн захирал
- 2007-2011 онд НҮБХХ-ийн Хүний эрхийг баталгаажуулах, ардчилсан засаглалыг хөгжүүлэх Мянганы хөгжлийн есдөх зорилгыг хэрэгжүүлэхэд дэмжлэг үзүүлэх төслийн Үндэсний захирал
- 2000-2008 онд УИХ-ын даргын ахлах зөвлөх
- 1997-2009 онд Монгол Улсын ШУА-ийн Философи, социологи, эрх зүйн хүрээлэнгийн захирал
- 2004-2008 онд МАХН-ын Удирдах зөвлөлийн гишүүн
- ШУА-ийн Тэргүүлэгч гишүүн (одоог хүртэл)
- Нүүдлийн соёл иргэншлийг судлах олон улсын хүрээлэнгийн Удирдах зөвлөлийн гишүүн
- 2004-2008 онд УИХ-ын дэргэдэх Судалгааны төвийн захирал
Нэр дэвшигч Г.Чулуунбаатар нь 1997 оноос ШУА-ийн Нийгмийн ухааны Бага чуулганы гишүүнээр сонгогдон ажиллаж байгаа бөгөөд тус Бага чуулганы дэргэдэх философи, социологи, улс төр судлал, урлаг судлалын салбараар Шинжлэх ухааны доктор (Sc.D)-ын зэрэг хамгаалуулах Эрдмийн зөвлөлийн эрдэмтэн нарийн бичгийн дарга, Хамгаалуулах зөвлөлийн дарга (2014 оноос), МУИС, СУИС-ийн Эрдмийн зөвлөлийн гишүүн, Удирдлагын академийн эрдмийн зөвлөлийн дарга, Удирдахуйн ухаанаар докторын зэрэг хамгаалуулах зөвлөлийн дарга (2008 оноос) Нийгмийн ухаанаар доктор (Ph.D)-ын зэрэг хамгаалуулах зөвлөлийн орлогч дарга, 2014 оноос Философи, шашин судлалаар доктор (Ph.D)-ын зэрэг хамгаалуулах зөвлөлийн даргаар сонгогдон ажиллаж байна.
Б.Туул
Гэрэл зургийг Т.Чимгээ
Гэрэл зургийг Т.Чимгээ
