Ulaanbaatar
БАЯНХОНГОР: “Эрүүл бүс нутаг” статусаа хадгалахыг сануулав
ОРОН НУТГИЙН МЭДЭЭ | БАЯНХОНГОР
Баянхонгор, 2025 оны дөрөвдүгээр сарын 21 /МОНЦАМЭ/. Баянхонгор аймгийн мал эмнэлгийн салбарынхны "Нэгдсэн зөвлөгөөн" Баянхонгор суманд болж байна.
Зөвлөгөөнийг Баянхонгор аймгийн Засаг дарга Д.Мөнхсайхан нээж үг хэлэхдээ, малын халдварт өвчингүй эрүүл бүс статусаа хадгалж хамгаалахад голлох үүргийг гүйцэтгэсээр ирсэн малын эмч нар, мал эмнэлгийн салбарынханд талархал илэрхийлээд цаашид энэ байдлаа хадгалахыг сануулав. Мөн малын түүхий эд бүтээгдэхүүнийг эрэлтэд тулгуурлан уламжлалт шинэчлэлтийг хослуулан гаргаж, зах зээлд нийлүүлэхээр зорин ажиллаж буй ААН-үүдэд амжилт хүслээ. Салбарын зөвлөгөөнд Мал эмнэлгийн Ерөнхий газрын мал амьтны эрүүл мэндийн газрын дарга Б.Болдбаатар, Дэлхийн мал амьтны эрүүл мэндийн байгууллага, “Хил хязгааргүй малын эмч нар болон агрономчид” ОУТББ, Доктор, дэд профессор О.Баатарцогт, мал, малын гаралтай бүтээгдэхүүн нийлүүлэлтийн ААН-ийн төлөөллүүд, аймгийн МЭГ-ын дарга Л.Оюун-Эрдэнэ болон мал эмнэлгийн салбарынхан, сумдын удирдлагууд оролцож байна.
Зөвлөгөөний хүрээнд Мал эмнэлгийн Ерөнхий газраас салбарын хэмжээнд, аймгийн МЭГ-аас орон нутгийн хэмжээнд хийж хэрэгжүүлсэн ажил арга хэмжээ, үр дүнгийн талаар танилцуулж, энэ оны бодлого зорилтын тухайд тодорхой мэдээллээр хангаж, малын эрүүл мэнд, урьдчилан сэргийлэлт, малын гаралтай түүхий эд, бүтээгдэхүүн боловсруулалт анхаарах асуудал, эмийн зохист хэрэглээ зэрэг өргөн сэдвийн хүрээнд сургалт мэдээллийг өгчээ.Мөн үеэр малын гаралтай бүтээгдэхүүний үзэсгэлэн гаргаж байгаа бөгөөд зарим суманд мал эмнэлгийн тоног төхөөрөмж гардуулах юм.
