Ulaanbaatar
СЭЛЭНГЭ: "Атрын IV" аяныг албан ёсоор эхлүүлэхээ салбарын сайд зарлалаа
ОРОН НУТГИЙН МЭДЭЭ | СЭЛЭНГЭ
Сүхбаатар,
2024 оны аравдугаар сарын 21 /МОНЦАМЭ/. Монгол Улсад атар газар эзэмшиж, газар
тариаланг шинжлэх ухааны үндэслэлтэй бие даасан салбар болгон хөгжүүлсний түүхт
65 жилийн ой энэ онд тохиож байна.
Бүсчилсэн
хөгжлийн үзэл баримтлалд Дархан-Уул, Сэлэнгэ, Төв аймаг буюу төвийн бүс нутгийг
“Хөдөө аж ахуйн төрөлжсөн, аж үйлдвэрийн дэд бүс” болгохоор төлөвлөжээ.
Энэ
хүрээнд Хүнс, хөдөө аж ахуй, хөнгөн үйлдвэрийн яамыг Дархан-Уул аймагт
шилжүүлэн байршуулах шийдвэр гарч, үе шаттайгаар хэрэгжиж, яамны бүрэлдэхүүний
эхний ээлж, Хөдөө аж ахуйн корпорац, Хөдөө аж ахуйн бирж Дархан хотноо шилжин
ирээд байна.
Монгол
Улсын Ерөнхийлөгч У.Хүрэлсүх “Алтан намар-2024” ургацын баярын үйл ажиллагаанд
оролцсоныхоо дараа Дархан хот дахь Хүнс, хөдөө аж ахуй, хөнгөн үйлдвэрийн яамны
шинэ байранд ажилласан.
Монгол
Улсын Ерөнхийлөгч энэ үеэр яамны удирдлагын бүрэлдэхүүнтэй уулзаж, хүнс,
хөдөө аж ахуй, хөнгөн үйлдвэрийн салбарын нэгдсэн бодлого төлөвлөлт, Монгол
Улсын Ерөнхийлөгчийн санаачилсан “Хүнсний
хувьсгал” болон “Цагаан алт” хөтөлбөрийн хэрэгжилтийг эрчимжүүлэх талаар санал
солилцов.
Хүнс,
хөдөө аж ахуй, хөнгөн үйлдвэрийн сайд Ж.Энхбаяр энэ үеэр яам Дархан-Уул аймагт
шилжсэнээр салбарын хөрөнгө оруулалтын бодлогыг төвийн бүс рүү чиглүүлж,
хүнсний болон хөнгөн үйлдвэрийн кластерууд, бусад төрлийн үйлдвэрлэлийг төвийн
бүсэд хөгжүүлэхээс гадна тариалангийн эргэлтийн талбайг 200 мянган га-гаар
нэмэгдүүлэхээр төлөвлөж байгаагаа онцлоод "Атрын IV" аяныг эхлүүлнэ
гэдгээ албан ёсоор зарлалаа.
Монгол
Улсын Ерөнхийлөгч ирэх таван жилд гол нэр төрлийн 19 хүнсний бүтээгдэхүүнээр
дотоодын хэрэгцээгээ бүрэн хангах, цаашид хүнс экспортлогч орон болох зорилтыг
дэвшүүлж “Хүнсний хангамж, аюулгүй байдал” үндэсний хөдөлгөөнийг санаачлан
хэрэгжүүлж байна.
Үндэсний
хөдөлгөөнийг амжилттай хэрэгжүүлж, бодит үр дүнд хүргэх зорилгоор Монгол Улсын
Их Хурал 36 дугаар тогтоол баталж, хүнс, хөдөө аж ахуйн салбарт ирэх таван
жилийн хугацаанд 1.7 их наяд төгрөгийн хөрөнгө оруулалт, санхүүжилт хийхээр
шийдвэрлэж, Засгийн газарт тодорхой үүрэг, даалгавар өгсөн юм.
