Ulaanbaatar
Морин хуурын чуулга “Монголын сайхан орон” хүндэтгэлийн тоглолтоо Версалийн ордонд тоглов
МОНГОЛЫН МЭДЭЭ | СОЁЛ УРЛАГ
Улаанбаатар /МОНЦАМЭ/. Монгол
Улсын Ерөнхийлөгч Ухнаагийн Хүрэлсүх Бүгд Найрамдах Франц Улсын Ерөнхийлөгч
Эммануэл Макроны урилгаар төрийн айлчлал хийж байна.
Айлчлалын хүрээнд Монгол Улсын Соёлын элч Морин хуурын чуулга Франц Улсын Версалийн хааны ордны Дуурийн театрт анх удаа энэ сарын 11-нд тоглов.
Монгол үндэстний онцлог уламжлал, төрийн хүндэтгэл бэлгэдлийг агуулсан “Монголын сайхан орон” хүндэтгэлийн тоглолтыг Монгол Улсын Ерөнхийлөгч У.Хүрэлсүх, гэргий Л.Болорцэцэг болон Бүгд Найрамдах Франц Улсын Европ, Гадаад хэргийн сайд Катерин Колонна зэрэг францын төр, засаг, нийгмийн зүтгэлтнүүд, Парист төвтэй олон улсын байгууллагын удирдлагын төлөөлөл зэрэг 600 орчим өндөр албаны зочид урилгаар үзлээ.
Морин хуурын чуулга Версалийн ордны Хааны дуурийн театрын тайзнаа өөрийн урын сангаасаа үндэсний, ардын болон сонгодог төрлийн 15 бүтээлийг толилуулсан нь үзэгч олны талархлыг хүлээсэн бөгөөд тус театрт тоглосон Монголын анхны уран бүтээлчид болсноороо онцлог байв.
Морин хуурын чуулга үүсгэн байгуулагдсанаас хойш 31 жилийн хугацаанд 30 гаруй оронд 650 гаруй тоглолт хийгээд байна. Тухайлбал, АНУ-ын Нью-Йорк хотноо НҮБ-ын төв байр, БНФУ-ын Парис хотноо ЮНЕСКО-гийн төв байр, ОХУ-ын Большой театр, БНХАУ-ын Үндэсний их театр /Сувдан театр/, Япон Улсын NHK телевизийн концертын их танхим болон Сиднейн Дуурийн театрт амжилттай тогложээ.
Морин хуурын чуулга 2023 оны 10 дугаар сарын 14-ний өдөр БНФУ-ын Нант хотын консерваторын тайзнаа мөн тоглох юм.
