Ulaanbaatar
"Аль-Каида"-гийн гурван гишүүнд хориг арга хэмжээ авчээ
ДЭЛХИЙН МЭДЭЭ | УЛС ТӨРВАШИНГТОН. /VOA/. АНУ-ын Сангийн яам Иран дахь “Аль-Каида” бүлэглэлийн гурван гишүүнд террорист бүлэглэлд зориулж хөрөнгө босгосон гэх үндэслэлээр хориг арга хэмжээ авлаа.
Фейсал Жассим Мохаммед Аль-Амри Аль Халиди, Исра Мухаммад Ибрагим Баюми, Абу Бакр Мухаммад Гумаян нарыг “тусгайлан бэлтгэгдсэн олон улсын террористууд” гэж нэрлэжээ.
“Халиди нь “Аль-Каида” бүлэглэлийн нөлөө бүхий гишүүн бөгөөд Пакистаны “Талибан” бүлэглэлийн батальоныг командалж байсан бол Баюми нь Иранд баривчлагдсан “Аль-Каида” бүлэглэлийн гишүүдийг чөлөөлөх ажиллагаанд оролцсон террорист бүлэглэлийн гишүүн юм. Харин Гумаян нь “Аль-Каида”-гийн санхүү, харилцаа холбоо, ложистикийн асуудлыг хариуцан ажилладаг байсан” гэж мэдэгдэлд дурдсан байна.
Энэ хориг арга хэмжээний хүрээнд АНУ-ын байгаа тэдний бүх хөрөнгийг хурааж, Америкийн иргэд болон компаниудыг тэдэнтэй хамтран бизнес хийхийг хоригложээ.
Д.Нямтулга
