Ulaanbaatar
Хөвсгөлийн 2 суманд шүлхийн 7 голомт бүртгэгдлээ
ОРОН НУТГИЙН МЭДЭЭ | ХӨВСГӨЛ
Хөвсгөл /МОНЦАМЭ/. Хөвсгөл аймгийн Бүрэнтогтох суманд энэ сарын 2-нд шүлхий өвчний тохиолдол бүртгэгдсэн. Өвчлөл нэмэгдсээр өнөөдрийн байдлаар Хөвсгөл аймгийн Бүрэнтогтох суманд 3, Цагаан-Уул суманд 4, нийт 7 голомт бүртгэгджээ. Голомттой болон сэжигтэй бүсэд 353 өрхийн 12442 үхэр, 312 тэмээ, 131076 хонь, 63023 ямаа нийт 206853 толгой мал байгаагаас 53 өрхийн 640 үхэр, 801 хонь, 98 ямаа нийт 1539 толгой мал өвчилсөн байна.
Мал эмнэлгийн ерөнхий газраас шүлхий өвчнөөс урьдчилан сэргийлэх вакцинжуулалтад Бүрэнтогтох сумын Сангийн далай багийн 50 өрхийн 1542 үхэр, 18435 хонь, 7892 ямаа, нийт 27869 толгой мал вакцинд хамруулаад байна гэж Хөвсгөл аймгийн Мал эмнэлгийн газраас мэдээллээ.
