Ulaanbaatar
Панжшерийн эсэргүүцэгчид тэмцлээ зогсоох болзлоо хэлжээ
ДЭЛХИЙН МЭДЭЭ | УЛС ТӨР
ВАШИНГТОН. /RIA Novosti/. Талибан хөдөлгөөний хяналтад ороогүй Афганистаны цорын ганц бүс нутаг болох Панжшер мужийн Үндэсний эсэргүүцлийн фронтын удирдагч Ахмад Масуд тус хөдөлгөөнтэй тэмцлээ зогсоох болзлоо хэлжээ.
“Хэрэв талибууд эрх мэдлийг бүгдтэй хуваалцан, шударга ёс тогтоож, Афганистанд хүн бүрт тэгш эрх, эрх чөлөө олговол би ухарч, улс төрөөс холдоно" гэж тэрбээр “Foreign Policy” сэтгүүлд ярилцлага өгөхдөө мэдэгдсэн байна.
Талибуудыг эсэргүүцэхээ зогсоох түүний хэлсэн өөр нэг болзол нь гүйцэтгэх эрх мэдлийн байгууллагуудыг нэг гарт төвлөрүүлэхгүй байх юм.
“Талибан” ийм нөхцөлүүдийг бүрдүүлж чадахгүй бол Панжшер муж тэднийг эсэргүүцсээр байна гэж Масуд цохон тэмдэглэсэн байна. Түүнчлэн гадаад улс орноос ямар ч санхүүжилт аваагүй гэдгийг тэмдэглэжээ.
"Эх орноосоо дүрвэсэн Ашраф Ганигийн Засгийн газар олон бүс нутаг, улс орныг "Талибан"-ы талд зогсохоос аргагүй байдалд оруулсан. Тэдний үндсэрхэг хоосон гоё үгнээс эхлээд усан хангамжийн салбар хүртэлх энэ бүх бодлого хөрш орнуудтай дайсагнал үүсгэж, тэднийг “Талибан”-д ойртуулсан” гэж тэрбээр хэлсэн байна.
“Талибан” хөдөлгөөн Афганистаны Засгийн газрын хүчний эсрэг давшилтаа наймдугаар сарын эхээр эрчимжүүлсэн юм. Талибууд наймдугаар сарын 15-нд нийслэл хотод орж, Ерөнхийлөгчийн ордныг хяналтдаа авсан бол наймдугаар сарын 16-нд Афганистанд дайн дууссаныг, түүнчлэн улс орныг удирдах засаглалыг хэлбэрийг ойрын үед тодорхойлно гэж мэдэгдсэн. Тус хөдөлгөөний хяналтад ороогүй цорын ганц муж бол Панжшер юм.
