Ulaanbaatar
Аймгийн алдарт уяачид цол чимгээ гардан авав
ОРОН НУТГИЙН МЭДЭЭ | ДУНДГОВЬ
Дундговь /МОНЦАМЭ/. Ковид цар тахлын улмаас энэ жил наадам хийгээгүй ч “Нарны
хүлэг” уяачдын холбооноос хүсэлт гаргасны дагуу Дундговь аймгийн Онцгой
комиссын 21 дүгээр хуралдаанаас “Мандалын хурд” зохион байгуулахыг зөвшөөрсөн.
Тиймээс энэ сарын 21-нд Дэрэн сумын нутагт “Мандалын
хурд-21” уралдаан болж, 5 насны 152 морь уралдаж, энэ үеэр шинээр төрсөн
аймгийн алдарт уяачид цол, чимгээ гардан авчээ.
Тодруулбал, Баянжаргалан сумын уяач С.Сүхбаатар, Хулд
сумын уяач П.Өлзийхүү, Б.Эрдэнэтогтох , Өлзийт сумын уяач Л.Лодойсамбуу, Эрдэнэдалай сумын уяач О.Мөнхсайхан,
О.Мөнхбат, О.Мөнхтулга, Ю.Эрдэнэбаяр, Адаацаг сумын уяач Б.Хадбаатар нар аймгийн
алдарт уяачийн болзлыг хангасан байна.
Аймгийн баяр наадмын хурдан морины уралдаанд морь нь 6
удаа түрүүлсэн, эсхүл 12 удаа айрагдсан уяачид аймгийн алдарт уяач цол олгодог
аж.
Энэхүү уралдааны үеэр 5 насны нийт 152 морийг 55 морь
унаач хүүхэд унаж уралдсан бөгөөд уралдааны үеэр мориноос унаж бэртэл гэмтэл авсан хүүхэд
байхгүй гэдгийг мэргэжлийн байгууллагаас онцоллоо.
Аймгийн МХГ-аас байцаагчид ажиллаж, морь унаач хүүхдүүдийн
хамгаалах хувцас хэрэгсэл, гэнэтийн ослын даатгал, эцэг, эх, уяач, хүүхдийн
гурвалсан гэрээ, коронавирусний түргэвчилсэн
шинжилгээнд бүрэн хамруулсан эсэхэд хяналт тавьсан аж.
