Ulaanbaatar
Хяналтын пост 5 чиглэлд ажиллаж байна
ОРОН НУТГИЙН МЭДЭЭ | ХӨВСГӨЛ
Хөвсгөл /МОНЦАМЭ/. Хөвсгөл аймгийн Онцгой комиссоос коронавирусний халдвараас сэргийлэх зорилгоор 5 чиглэлд авто замын шалган нэвтрүүлэх цэгийг ажиллуулж байна.
Аймгийн Засаг дарга бөгөөд Онцгой комиссын дарга Ш.Идэрбаясгалангийн захирамжаар ирэх оны 2 дугаар сарын 23 хүртэл хяналтын постод ажиллах сумын төрийн албан хаагч нарын хуваарийг баталсан байна. Тариалан сумын Намнангийн ард байрлах авто замын шалган нэвтрүүлэх цэгт Арбулаг, Алаг-Эрдэнэ, Баянзүрх, Түнэл, Их-Уул, Чандмань-Өндөр, Цагаан-Үүр, Хатгал, Мөрөн, Эрдэнэбулган, Тариалан сумаас алба хаагчид 5 хоногоор ээлжлэн ажиллана. Мөн Рашаант сумын 3-р багт байрлах Дөрөлж постод Тосонцэнгэл, Рашаант, Төмөрбулаг сум, Жаргалант сумын Ороохын даваа, Солонготын давааны хяналтад Шинэ-Идэр, Галт, Жаргалант сум, Цэцэрлэг сумын Согоотын давааны постод Бүрэнтогтох, Цагаан-Уул, Цэцэрлэг сум хариуцан ажиллах ажээ.
