Ulaanbaatar
Орхон аймагт тусгаарлалтад байгаа 61 иргэний шинжилгээний хариу сөрөг гарчээ
ОРОН НУТГИЙН МЭДЭЭ | ОРХОН
Орхон /МОНЦАМЭ/ Өнөөдрийн байдлаар Орхон аймагт 119 иргэн “Элит”, “Дээдэс”, “Эрдэнэт” зочид буудал болон “Эрдэнэт” сувиллын цогцолборт тусгаарлалтад байна.
Энэ сарын 14-нд Сэлэнгэ аймгийн Алтанбулаг боомтоор ОХУ-аас 61, 15-нд 58
иргэн ирж 21 хоногийн турш тусгаарлалтад байна. Эхэнд ирсэн 61 иргэний хариу
сөрөг гарсан бол үлдсэн 58 иргэний шинжилгээний хариу маргааш гарна.
Орхон аймаг өмнө нь 207 иргэнийг 14 хоногийн турш
тусгаарлалтад авч Улсын Онцгой комисс, ЭМЯ, МХЕГ-ын заавар зөвлөгөөний дагуу
өндөржүүлсэн бэлэн байдалд хариуцлагатай ажилласан. Энэ удаа 119 иргэнийг тус бүрт нь
нэг, нэг өрөөнд тусгаарлаж байна. Тусгаарлалтын орчин нөхцөлөөс гарч буй хог
хаягдлыг аюултай хог хаягдалд тооцон халдваргүйжүүлж устгана. Мөн дээрх 119
иргэнээс 21 хоногийн хугацаанд гурван
удаа шинжилгээ авна. Шинжилгээг Дархан-Уул аймагт хийнэ.
Эрсдэлт нөхцөл үүсвэл Орхон аймагт амьсгалын зургаан
аппарат бэлэн байгаа бөгөөд цаашид дөрвийг нэмэх шаардлагатай гэнэ.
Тусгаарлалтад байгаа иргэдэд нийт 30 гаруй эмч, сувилагч, тогооч, цагдаа үйлчилж
байна.
