Ulaanbaatar
Японд “ремдесивир”-ийг эмчилгээнд ашиглахыг ойрын хугацаанд зөвшөөрнө
ДЭЛХИЙН МЭДЭЭ | ЭРҮҮЛ МЭНД
ТОКИО. /Kyodo/. "Манай компани шинэ коронавирусээр
халдварласан өвчтөнүүдийг эмчлэхэд вирусний эсрэг “ремдесивир” эмийг ашиглах
хүсэлтийг Японы Эрүүл мэндийн яаманд гаргасан" гэж АНУ-ын “Gilead” эм, эмийн бүтээгдэхүүн үйлдвэрлэгч
компани даваа гарагт мэдэгджээ.
Японы эрүүл
мэндийн сайд Кацүнобү Като, “Gilead” компани “ремдесивир”-ийн талаар хүсэлт гаргасан тохиолдолд нэг долоо
хоногийн дотор зөвшөөрөл олгоно гэж өнгөрсөн бямба гарагт мэдэгдсэн юм. Эрүүл
мэндийн яам энэхүү шийдвэрийг гаргасан тохиолдолд Японд “COVID-19”-өөр халдварласан өвчтөнүүдийг эмчлэх
зөвшөөрөл авсан анхны эм “ремдесивир” болох төлөвтэй байна.
АНУ-ын Хүнс, эмийн
хяналтын удирдлагын газар “ремдесивир”-ийг яаралтай тусламжийн эмээр ашиглахыг өнгөрсөн баасан гарагт зөвшөөрсөн юм. Эмнэлзүйн сүүлийн
туршилтуудаас үзэхэд “ремдесивир” уусан хүнд өвчтөнүүд харьцангуй хурдан эдгэрч
байсан гэж уг байгууллагын мэдэгдэлд
тэмдэглэжээ.
“Ремдесивир”-ийг “Эбола” вирусийг эмчлэх зорилгоор гарган авсан хэдий ч үүнд албан ёсны зөвшөөрөл олгоогүй байгаа юм. Уг эм “COVID-19” халдвар авсан өвчтөнүүдэд үр дүн үзүүлэх эсэхийг шалгах эмнэлзүйн туршилт Япон тэргүүтэй дэлхийн олон оронд үргэлжилж байгаа юм.
“Манай Засгийн газар эх орондоо ургасан, вирусний эсрэг “Авиган” эмийг “COVID-19” халдвар авсан өвчтөнүүдийг эмчлэхэд ашиглах зөвшөөрлийг энэ сарын эцсээр олгохоор төлөвлөж байна” гэж Ерөнхий сайд Абэ Шинзо даваа гарагт мэдэгджээ. Хятадад явуулсан шинжлэх ухааны судалгаанаас үзэхэд, энэхүү эм "COVID-19"-ийн эсрэг үр дүн үзүүлсэн байна.
