Ulaanbaatar
“XXI зууны Буддын өв соёл,үнэт зүйлс” сэдвээр ном хаялцаж байна
МОНГОЛЫН МЭДЭЭ | СОЁЛ УРЛАГ
Улаанбаатар /МОНЦАМЭ/. “XXI зууны Буддын өв
соёл,үнэт зүйлс” сэдвээр эрдэмтэд, хутагтууд ном хаялцсан олон улсын эрдэм шинжилгээний хурал үргэлжилж байна. Эрдэм шинжилгээний хуралд ШУА-ийн Тэргүүн дэд ерөнхийлөгч, академич Г.Чулуунбаатар БНЭУ-ийн Вивекананда сангийн тэргүүн Арвинд Гүпта, Олон улсын буддын холбооны ерөнхий нарийн бичгийн дарга Гэвш Жанчүв Чойдон нар мэндчилгээ дэвшүүлэв.
Азийн буддистуудын энх тайвны бага хурлын XI ерөнхий чуулганы хүрээнд, “XXI зууны Буддын өв соёл, үнэт зүйлс” сэдэвт олон улсын эрдэм шинжилгээний хурал Монголын Бурхан Шашинтны төв Гандантэгчэнлин хийдийн “Батцагаан” цогчэн дуганд хоёр дахь өдрөө болж байгаа юм. Эрдэм шинжилгээний хурлыг хамтран зохион байгуулагчаар ШУА, МУИС, ШУТИС оролцож байна. Хуралд ОХУ-ын Буриад, Тува, Энэтхэг, Шриланка, Балба, Япон, Лаос, Камбож зэрэг улсаас ирсэн зочдод өнөөдөр Монголын эрдэмтэн судлаачид илтгэл сонордуулж байна.
“Буддизмын оюуны үнэт зүйл ба хүн төрөлхтний хөгжил дэвшил”, “Нийгмийн өөрчлөлт ба Азийн буддистуудын энх тайвны бага хурлын чиг хандлага”, “Дэлхийн бурханы шашны өв соёлд монголчуудын оруулсан хувь нэмэр” зэрэг 18 илтгэлийн эхний хэсэг ийнхүү хэлэлцэгдэж байна. Хурлын завсарлагаанаар ч АБЭТБХ-ын Азийн бүсийн үндэсний төвөөс ирсэн төлөөлөгчид бүс нутаг бүртээ тулгамдаж буй асуудлыг энх тайвны замаар шийдвэрлэх арга зам, хамтын ажиллагаа, ирээдүйн зорилт зорилгынхоо талаар үзэл бодлоо хуваалцаж байна. Монгол Улс нь Буддын өв соёлыг хамгаалах, өвлүүлэх, үндэсний төвийн хувьд эрдэм шинжилгээний хурлаар дамжуулан 50 жилийн турш явуулсан энхийн үйлс, цаашдын үйл ажиллагааны чиг хандлагыг тодорхойлох зорилгоо ч ил тод тайлбарлаж байна.
Маргаашаас гадаадын 20 гаруй эрдэмтэн судлаач илтгэл тавьж хэлэлцүүлнэ. Д.Отгонцагаан
