Ulaanbaatar
Алдартай хөгжмийн зохиолчдын сантай хамтран ажиллана
МОНГОЛЫН МЭДЭЭ | СОЁЛ УРЛАГ
Улаанбаатар /МОНЦАМЭ/. Монгол Улсын Консерваторийн Хөгжмийн ухаан, дуулаачийн сургуулийн захирал Х.Алтангэрэл, Хөгжмийн ухааны тэнхимийн эрхлэгч Ч.Энхбат нар “Шарав сан”, “Нацагдорж сан”, “Лувсанжамбын Мөрдорж сан”, “Лувсаншарав сан”, “Ц.Чинзориг сан” зэрэг Монголын алдартай хөгжмийн зохиолчдын нэрийг мөнхжүүлсэн сангуудын тэргүүн нарыг урьж уулзалт хийлээ.
Уулзалтад мөн Монгол Улсын Консерваторийн захирлын үүрэг гүйцэтгэгч Ц.Пүрэвхүү оролцов. Монголын мэргэжлийн хөгжмийн урлагийн уурхай болсон тус консерватори нь үндэснийхээ алдар цуутай хөгжмийн зохиолчдын уран бүтээлийг сурталчлах, сургалтын урын санд түлхүү оруулж байх болон ирээдүйн хөгжмийн зохиолчдын залуу үеийг хэрхэн бэлтгэх тухай зэрэг олон чухал асуудлыг хэлэлцэн ярилцаж цаашид хамтран ажиллахаар болов гэж хөгжим судлаач С.Энхбулаг мэдээллээ.
