Ulaanbaatar
Харилцаагаа тасалснаар алдаагаа хаацайлж чадахгүй гэв
ДЭЛХИЙН МЭДЭЭ | УЛС ТӨРМОСКВА. /Sputnik/. Саудын Араб Ирантай дипломат харилцаагаа тасалснаараа лалын шиитийн нэр хүндтэй санваартныг цаазаар авсан “том алдаа”-гаа хаацайлж чадахгүй гэж Ираны Гадаад хэргийн орлогч сайд Хоссейн Амир-Абдоллахиан хэлсэн байна.
Рияд Тегерантай харилцаагаа тасалснаараа шейх Нимр аль-Нимрийг цаазаар авсан “том алдаа”-гаа нуун дарагдуулж чадахгүй гэж тэрбээр хэлснийг ням гарагийн орой тус улсын “Press TV” уламжилжээ.
Терроризмтой холбон буруутгаж 47 хүнийг цаазаар авсан тухайгаа Саудын Араб мэдэгдсэн бөгөөд тэдний дунд аль-Нимр байсан юм. Уг хэргээс үүдэн дипломат маргаан дэгдэж, шашны урсгалаас үүдэлтэй тэмцэл даамжирлаа.
"Бүс нутагтаа хамгийн аюулгүй орнуудын нэг нь Иран” гэж Амир-Абдоллахиан хэлжээ. Тэрбээр Рияд Тегерантай дипломат харилцаагаа тасалж буй талаарх Саудын Арабын Гадаад хэргийн сайд Адель аль-Жубеирийн хийсэн мэдэгдэлд хамгийн түрүүнд хариулсан Ираны албан тушаалтан юм.
Х.Аминаа
