Ulaanbaatar
Украин, Гүржийн багууд ЕАШТ-ний шувтаргын шатанд шалгарлаа
ДЭЛХИЙН МЭДЭЭ | СПОРТ
ЛОНДОН, 2024 оны гуравдугаар сарын 27 /ВВС/. Украин ба Гүржийн хөл бөмбөгийн шигшээ багууд мягмар гарагт болсон Европын аварга шалгаруулах тэмцээний /ЕАШТ/ сонгон шалгаруулах нэмэлт тоглолтуудад Исланд, Грекийн багуудыг хожсоноор 6 дугаар сард эхлэх шувтаргын шатанд шалгарлаа.
Тодруулбал, Гүржийн хөлбөмбөгчид торгуулийн цохилтоор грекчүүдийг 4:2 харьцаагаар хожсоноор түүхэнд анх удаагаа ЕАШТ-ийн шувтаргын шатны тэмцээнд оролцох болзлыг хангажээ. Тбилиси хотын “Динамо Арена” цэнгэлдэх хүрээлэнд болсон тоглолт үндсэн ба нэмэлт цагт 0:0 харьцаагаар өндөрлөсөн байна. Гүржийн баг торгуулийн цохилтоор ялсны дараа хөөрч догдолсон хөгжөөн дэмжигчид талбайд гүйн гарч ирцгээжээ. Тус багийг Францын шигшээ багт тоглож байсан Вилли Саньоль дасгалжуулж байгаа юм.
Харин Украины хөлбөмбөгчид өмнө
нь ЕАШТ, ДАШТ зэрэг том тэмцээнүүдийн шувтаргын шатанд оролцож байсан
туршлагатай. Өмнөх 2020 оны ДАШТ-нд Украины баг шилдэг 8-д шалгарсныхаа дараа Английн шигшээд
хожигдож байсан юм.
Сонгон шалгаруулалтын нэмэлт
тоглолтод украинчууд нэг гоол алдан хожигдож яваад тоглолтын төгсгөлд ялалт
байгууллаа. 1-р үед исландчууд нэг гоол оруулснаар давамгайлж эхэлсэн бол 54 дэх минутанд Испанийн “Жирона” багт тоглодог Виктор Цыганков, 84 дэх
минутанд Английн “Челси”-гийн тоглогч Михаил Мудрик нар хариу хоёр гоол хийснээр багаа ялалтад хүргэжээ.
Ингэснээр Гүржийн баг ЕАШТ-ний
шувтаргын шатанд Турк, Португал, Чехийн багуудтай F хэсэгт тоглох бол Украины
шигшээ Бельги, Словак, Румынтай E хэсэгт учраа таарлаа.
Мягмар гарагт болсон сонгон
шалгаруулалтын өөр нэг тоглолтод Уэльсийн хөлбөмбөгчид Польшийн багт торгуулийн
цохилтоор хожигдлоо. Ингэснээр Их Британийн 4 багаас Англи, Шотландын багууд
ЕАШТ-ний шувтаргын шатанд оролцохоор болж байна.
ЕАШТ 2024 оны 6 дугаар сарын 14-нөөс
7 дугаар сарын 14 хүртэл үргэлжилнэ.
