Ulaanbaatar
Парамушир аралд цунамийн гурван давлагаа бүртгэгджээ
ДЭЛХИЙН МЭДЭЭ | БАЙГАЛЬ ОРЧИН
ӨМНӨД САХАЛИН, 2025 оны долоодугаар сарын 30 /TASS/. Парамушир арлын Умард Курил хотын эргийн бүсэд (Курилийн арлууд, Сахалин муж) цунамийн гурван давлагаа орж иржээ. Сүүлчийн давлагаа хүчтэй байсан бөгөөд боомтод бэхлээтэй байсан усан онгоцуудыг далайн хоолой руу түрж оруулсан гэж хотын захирагч Александр Овсянников мэдээлжээ.
"Цунамийн эхний давлагаа эрэг рүү 200 орчим метрт орж ирсний дараа дахин хоёр давлагаа ирсэн, хоёр дахь нь сул байсан бол гурав дахь нь илүү хүчтэй байсан. Сүүлчийн давлагаа усан онгоцуудыг хоолой руу түрж гаргаж, боомтын дэд бүтэц эвдэрсэн" гэж тэрбээр мэдээлжээ.
Оросын Онцгой байдлын яамнаас мэдээлснээр, Умард Курил хотын боомт, мөн "Алаид" загасны үйлдвэр усанд автжээ. Хотын оршин суугчдыг цунамийн аюул бүрэн арилтал өндөр газар руу нүүлгэн шилжүүлсэн байна.
Өнөө өглөө Камчаткийн орчимд 1952 оноос хойших хамгийн хүчтэй буюу 8.7 магнитудын хүчтэй газар хөдлөлт бүртгэгдсэн бөгөөд 7.5 хүртэлх магнитудын хүчтэй чичирхийллүүд нэг сарын турш үргэлжлэх төлөвтэй байгааг судлаачид мэдээлжээ.
Цунамийн аюулын түгшүүрийг Японы зүүн эргийн дагуу, мөн АНУ-ын Аляска, Калифорни, Орегон муж улсуудад зарласан байна.
