Ulaanbaatar
Австрали улс хямралыг даван туулахын тулд нүүрсний цахилгаан станцуудаа дахин ашиглана
ДЭЛХИЙН МЭДЭЭ | НИЙГЭМ
СИДНЕЙ. /TASS/. Австралийн эрх баригчид эрчим хүчний хямралыг даван туулахын тулд ашиглалтаас гаргасан нүүрсний цахилгаан станцуудаа дахин ажиллуулахаар төлөвлөж байна. Энэ талаар тус улсын Нөөцийн сайд Мадлейн Кинг мэдэгджээ.
Түүний мэдэгдсэнээр, 2020 оноос нүүрсээр ажилладаг хуучирсан цахилгаан станцуудыг ашиглалтаас гаргасан нь “улс орныг эрчим хүчний хямрал руу хөтөлсөн гол хөдөлгөгч хүчин зүйл” болжээ. Тиймээс "Австралид 30 хүртэлх хувийн нэмэлт эрчим хүчний хүчин чадалтайгаар өвлийг даван туулахын тулд" оператор компаниуд эдгээр станцыг аль болох хурдан дахин ашиглалтад оруулах шаардлагатай байна гэж сайд мэдэгдсэн байна.
Нүүрсний цахилгаан станцуудыг зогсоосны улмаас үүссэн эрчим хүчний хомсдолыг нөхөх сэргээгдэх эрчим хүчний эх үүсвэр тус улсад хангалтгүй байгаа тул эдгээр станцад хөрөнгө оруулахаас татгалзаж, ашиглалтаас гаргасан нь цаг хугацааны хувьд эртэдсэн шийдвэр байсан гэдгийг Австралийн сайд онцолжээ. "Бид үнэхээр нүүрсээр ажилладаг цахилгаан станцуудыг дахин ашиглалтад оруулах хэрэгтэй. Яагаад гэвэл яг одоо энэ бол хямралаас гарах цорын ганц арга зам юм" гэж сайд цохон тэмдэглэсэн байна.
Хийн хомсдолд орж, цахилгаан эрчим хүчний үнэ өссөний улмаас Австрали улс түүхэн дэх хамгийн ноцтой эрчим хүчний хямралын ирмэг дээр байгааг тус улсын Эрчим хүчний сайд Крис Боуэн өмнө нь мэдэгдсэн билээ. Австралийн эрх баригчдын мэдээлснээр, зүүн өмнөд болон зүүн эрэгт нь огцом хүйтэрсний улмаас хэрэглэгчдийн хий, цахилгаан эрчим хүчний эрэлт нэмэгдсэн бөгөөд энэ нь дэлхийн эрчим хүчний үнэ өндөр байгаатай зэрэгцэн нийлүүлэлтийн хямрал, их хэмжээний тасалдал үүсгэсэн байна. Тус улсад зургаадугаар сарын эхний долоо хоногт хийн бөөний үнэ нэг гигажоуль нь /25.5 шоо метр/ 10 австрали доллароос (7.17 ам.доллар) 800 австрали доллар (573.28 ам.доллар) болж, 800 хувиар өсөн түүхэн дээд үзүүлэлтээс давжээ.
