Ulaanbaatar
Ираны цөмийн гэрээний талаарх хэлэлцээг үргэлжлүүлнэ
ДЭЛХИЙН МЭДЭЭ | УЛС ТӨР
ТЕХРАН. /France24/. Ираны цөмийн гэрээг сэргээх талаарх хэлэлцээ Австрийн нийслэл Вена хотноо 11 дүгээр сарын 29-нд үргэлжилнэ гэж Европын Холбооны /ЕХ/ Гадаад харилцааны албанаас лхагва гарагт мэдэгджээ.
“Үйл ажиллагааны
хамтарсан цогц төлөвлөгөөний хамтарсан комисс Венад 11 дүгээр сарын 29-нд
биечлэн хуралдана. Энэхүү уулзалтыг ЕХ-ны Гадаад харилцааны бодлого хариуцсан
дээд төлөөлөгч Жозеп Боррелийн өмнөөс Энрике Мора даргална” гэж уг мэдэгдэлд дурджээ.
Иран үүрэг амлалтаа
биелүүлбэл цөмийн гэрээнд эргэн нэгдэнэ гэдгээ мэдэгдээд буй АНУ-ын хувьд Иран “нухацтай”
хандвал тохиролцоонд хүрэх боломжтой хэмээн үзэж байгаагаа илэрхийлсэн байна.
Ираны Гадаад
хэргийн дэд сайд, цөмийн хэлэлцээ хариуцсан төлөөлөгч Али Бакери Кани мөн 11
дүгээр сарын 29-ний өдөр цөмийн хэлэлцээ үргэлжилнэ гэдгийг нотлон мэдэгджээ. Тэрбээр
Э.Моратай утсаар ярих үеэрээ ийнхүү товлосон гэдгээ “Twitter” хуудсандаа нийтэлсэн байна.
ЕХ-ны мэдэгдэлд дурдсанаар, гэрээнд оролцогч талууд болох Их Британи, БНХАУ, Франц, Герман, ОХУ-ын төлөөлөгчид хэлэлцээнд оролцох бөгөөд энэ үеэр АНУ-ын гэрээнд эргэн нэгдэх боломжийн талаар хийгээд талууд хэлэлцээрийг хэрхэн бүрэн дүүрэн, үр дүнтэй хэрэгжүүлэх тухай хэлэлцэх ажээ.
А.Бакерийн хувьд “Twitter”-тээ, “Бид энэ сарын 29-нд Венад хууль бус,
харгис хэрцгий хориг арга хэмжээнүүдийг цуцлах зорилго бүхий хэлэлцээг эхлүүлэхээр
тохиролцоо” хэмээн бичжээ. АНУ-ын Ерөнхийлөгч асан Дональд Трамп 2018 онд улс
орноо цөмийн гэрээнээс гаргасан юм.
