Ulaanbaatar
“Монголын мэдээлэл, худалдааг дэмжих төв"-ийг Берлинд нээлээ
МОНГОЛЫН МЭДЭЭ | УЛС ТӨР
Улаанбаатар /МОНЦАМЭ/. Монгол Улсыг Европын холбооны улсад сурталчлах, Монголын мэдээлэл, худалдааг дэмжих Берлин хот дахь Төвийн нээлт 8 дугаар сарын 27-нд боллоо.
Нээлтэд Монгол Улсаас ХБНГУ-д суугаа Онц бөгөөд Бүрэн эрхт Элчин Сайд Д.Ганбат, Бундестагийн гишүүн М. Грунд, К.Күлитц, М.Хэльд, Берлин хотын захирагч М.Мюллер, тус төвийн гүйцэтгэх захирал Н.Эрдэнэцогт, Европын ТРАМ төслийн Ахлах эксперт К.Круг болон ХБНГУ-ын Гадаад харилцаа, Эдийн засгийн яамдын холбогдох албан тушаалтнууд, Германы бизнесийн танхим, компаниудын төлөөлөгчид оролцлоо. Нээлтийн үйл ажиллагаанд МҮХАҮТ-ын ерөнхийлөгч О.Амартүвшин цахимаар оролцож, мэндчилгээ дэвшүүллээ.
Тэрээр “Европын Холбооны санхүүгийн дэмжлэгтэйгээр 2017 оны 3 дугаар сараас эхлэн хэрэгжиж эхэлсэн “Монголын худалдааг дэмжих төсөл” нь шинэчилсэн “Хөнгөлөлтийн Ерөнхий систем” (GSP+)-ийн ашиглалтыг сайжруулахаар Монголын бизнес эрхлэгч нарт томоохон дэмжлэг үзүүлсэн. Тус төслийн хүрээнд эдийн засгийг төрөлжүүлэх, уул уурхайн бус бараа бүтээгдэхүүний экспортыг нэмэгдүүлэх чиглэлээр Монголын 100 гаруй ЖДҮ, аж ахуйн нэгжийг чадавхжуулан, 5 кластерыг хөгжүүлж, Европын холбооны улсууд руу тухайлан ХБНГУ руу “Гүүр”-ээ тавьж чадсан” гэдгийг онцоллоо.
МҮХАҮТ нь энэ төвийг Берлин хотод нээх тухай Харилцан ойлголцлын санамж бичгийг Монгол-Германы Бизнесийн Холбоотой 2019 оны 11 дүгээр сард байгуулж байсан бөгөөд Монголын бүтээгдэхүүний борлуулалтыг дэмжсэн төвийг Берлин хотод нээснээр гадаадын хөрөнгө оруулалтыг татах, Монголын бараа бүтээгдэхүүнийг Европын холбооны зах зээлд амжилттай нэвтрүүлэх боломж нээгдэж байна.
Шинэчилсэн хөнгөлөлтийн ерөнхий системд Монгол Улс хамрагдсанаар манай улсаас 6300 орчим нэр төрлийн бараа Европын холбооны улсуудад гаалийн татваргүй нэвтрэх боломж бүрдсэн юм.
