Ulaanbaatar
Хууль бус 500 гаруй цагаач Испанийн эрэгт хүрэхийг оролджээ
ДЭЛХИЙН МЭДЭЭ | НИЙГЭМ
МАДРИД. /РИА Новости/. Резинэн завиар Испанийн эрэгт хүрэхийг оролдож байсан 500
гаруй хүнийг өнгөрсөн амралтын өдрүүдэд олж илрүүлсэн тухай тус улсын Далай
тэнгисийн аврах алба мэдээлжээ.
Бямба гарагт аврагчид Газрын Дундад тэнгисийн
өмнөд эрэг хавьд оршдог Испанийн Андалусия өөртөө засах орны эрэг хавиас нийтдээ
381 сууж явсан 10 завь, Балеарын арлуудаас 12 хүн бүхий бас нэг завь олж
илрүүлсэн байна.
Ням гарагт аврагчид Газрын Дундад тэнгисийн хамгийн баруун хэсэг болох Альброн тэнгист хоёр завинд 117 хүн сууж явсныг Малага хотод хүргэжээ.
Он гарснаас хойш Газрын Дундад тэнгисийг 78 мянга гаруй цагаач гаталсны 1700 гаруй нь амиа алдсан
байна. Хууль бус цагаачдын дийлэнх нь Испанид ногдож байгаа бөгөөд 34 238 хүн
Газрын Дундад тэнгисээр дамжин тус улсад иржээ. Энэ жил тус улсад ирж буй
цагаачдын урсгал гурав дахин өссөн байна. 2017 оны нэгдүгээр сараас есдүгээр
сарын эцсийн байдлаар 11 мянга гаруй цагаач Африкаас Газрын Дундад тэнгисийг
гатлан Испанид иржээ.
Д.Жаргал
