Ulaanbaatar
Өвөрхангайд нинжа нар байгаль орчинг сүйтгэж байна гэв
ОРОН НУТГИЙН МЭДЭЭ | ӨВӨРХАНГАЙ“Дэлхийн Монгол ногоон нэгдэл” ТББ-аас Өвөрхангай, Архангайд нинжа нараас болж байгаль орчин хэрхэн сүйдэж байгаа талаар мэдээлэл хийж, төрийн гурван өндөрлөг болон холбогдох яам тамгын газарт энэ талаар яаралтай арга хэмжээ авч ажиллахыг сануулж, албан бичиг хүргүүлж байгаагаа мэдэгдлээ.
Тодруулбал тус байгууллагынхан 10 сарын сүүлээр Архангай, Өвөрхангай аймгийн нутагт ажиллаад иржээ. Архангай аймгийн Цэнхэр сум, Өвөрхангай аймгийн Уянга, Нарийнтээл, Баруунбаян-Улаан суман дахь алт олборлолтын үйл ажиллагаанд үзлэг хийхэд тухайн орон нутагт хууль бус үйл ажиллагаа газар авч, Монгол орны онгон дагшин байгалийг хайр найргүй сүйтгэж байгаа нь тодорхой байсан байна.
Түүнчлэн Гол, мөрний урсац бүрэлдэх эх, усны сан бүхий газрын хамгаалалтын бүс, ойн сан бүхий газарт ашигт малтмал хайх, ашиглахыг хориглох тухай болон Ойн тухай хууль ноцтойгоор зөрчигдөж, байгаль орчны эсрэг гэмт хэрэг үйлдэгдсээр байгааг хэллээ. Тэд булаг шандны эхэн дээр ухаж ширгээх, нөхөн сэргээлт хийх нэрээр эрүүл газарт олборлолт явуулж сүйтгэх, малчдын өвөлжөөн дээр хүртэл ухаж байгаль орчноос гадна иргэдийн Үндсэн хуулиар олгосон эрүүл, аюулгүй орчинд амьдрах эрхийг ноцтой зөрчиж байна гэсэн юм.
Мөн хөдөө орон нутгийн зарим аймаг сумдад байгаль орчны эсрэг хууль бус ажиллагаа газар авч, ямар ч хяналт шалгалтгүй байсаар байна. Хууль хяналтын байгууллага тус гэмт хэргийг шалгаж, таслан зогсоох үүргээ биелүүлэхгүй, хууль зөрчигчдийг хамгаалах тохиолдол элбэг байсан. Харин энэ бүхэнд хяналт тавьж ажиллах ёстой шат шатны байгууллагынхан ажлаа хийхгүй байгаа нь авлига авсан байх магадлалтай гэж үзэхэд хүргэж байна гэлээ.
Б.Батчимэг
