СЭЛЭНГЭ: БНСУ-д хөдөө аж ахуйн чиглэлийн мэргэжилтэн, инженер бэлтгэнэ
ОРОН НУТГИЙН МЭДЭЭ | СЭЛЭНГЭ
Сүхбаатар, 2025 оны
дөрөвдүгээр сарын 7
/МОНЦАМЭ/. Сэлэнгэ аймаг, БНСУ
хоорондын найрамдалт хамтын ажиллагааны хүрээнд БНСУ-ын топ 5 сургуулийн нэг
болох Пусан хотын Кёнг нам чонбу их сургуульд тус аймгийн хүүхэд залуусыг 50
хувийн хөнгөлөлттэй сургахаар боллоо.
Өнгөрсөн амралтын өдрүүдэд тус сургуулийн
удирдах бүрэлдэхүүн Сүхбаатар, Мандал суманд зочилж, сумын удирдлагууд болон
ерөнхий боловсролын сургуулийн ахлах ангийн сурагчидтай уулзалт зохион байгуулж,
сургуулийнхаа танилцуулга мэдээллийг хийлээ.
Уулзалтад аймгийн Засаг дарга
Н.Лхагвадорж, аймгийн Боловсролын газрын дарга С.Тулга, Сүхбаатар, Мандал сумын
удирдлагууд болон Кёнг нам чонбу сургуулийн төлөөлөл оролцлоо.
Аймгийн удирдлагын багаас
"Нутгийн оюутан" хөтөлбөрийг хэрэгжүүлж ажиллах үүднээс гадаадын олон
улс, хот, мужуудтай хамтарч ажиллаж байгаагийн
нэг нь БНСУ юм.
Энэ жил аймгийн хэмжээнд
1202 сурагч ахлах ангиа төгсөж байна. Тус аймагт нарийн мэргэжлийн боловсон
хүчин дутагдалтай байгаа. Зөвхөн
Сэлэнгийн хүүхдүүд тус сургуульд 50 хувийн тэтгэлэгт хамрагдах боломжтойгоос
гадна өөрсдийн хичээл зүтгэлээрээ төлбөрөө 100 хувь хөнгөлүүлэх бүрэн боломжтой
юм.
39 мэргэжлээр боловсон хүчин бэлтгэдэг
Кёнг нам чонбу сургуулийн зүгээс тус аймгаас суралцах хүсэлтэй хүүхдүүдийг
тусгай хөтөлбөр боловсруулан сургаж дэмжихээ илэрхийллээ.
Суралцагсад 7 хоногийн 2 өдөр
хичээллэж бусад өдөр нь ажил эрхлэх боломжтой тусгай визтэй болох
боломжтойгоороо онцлог юм.
Мөн уулзалтын үр дүнд цаашид хамтын ажиллагааны хүрээнд ерөнхий боловсролын сургуулийн багш, эмч, төрийн албан хаагчдыг БНСУ-д чадавхжуулах сургалтад хамруулах юм.