Ulaanbaatar
Боловсролын салбарт 300 гаруй төсөл хэрэгжсэнийг онцлов
МОНГОЛЫН МЭДЭЭ | БОЛОВСРОЛБСШУС-ын сайд Ж.Батсуурь өчигдөр Япон улсаас Монгол Улсад суугаа Онц бөгөөд Бүрэн эрхт Элчин сайд Такэнори Шимизүг хүлээн авч уулзлаа.
Уулзалтын эхэнд Элчин сайд ноён Такэнори Шимизү манай улсад таван жилийн хугацаанд томилогдон ажиллахдаа томоохон төсөл, хөтөлбөрүүдийг амжилттай хэрэгжүүлэн боловсрол, соёлын салбарт дорвитой хувь нэмэр оруулсныг онцлон тэмдэглэв.
Японы Засгийн газрын буцалтгүй тусламжийн хүрээнд өнгөрсөн хугацаанд нийт 500 гаруй төсөл хөтөлбөр манай улсад хэрэгжжээ. Үүний 300 гаруй нь боловсролын салбарт хэрэгжсэн байна. Тухайлбал, “Өвсний үндэс” хөтөлбөрийн хүрээнд нийт 55 ЕБС-ийг шинээр барьж байгуулжээ. Мөн соёлын салбарт чанартай боловсон хүчин бэлтгэх зорилгоор Япон улсад 60-70 оюутан залуус тэтгэлгээр суралцаж байгаа аж. Энэ мэтчилэн өмнө нь хэрэгжүүлсэн төсөл, хөтөлбөрийг цааш үргэлжлүүлэхийг Японы төлөөлөгчид хүсэв. Түүнчлэн ирэх 2020 онд Токио хотноо болох зуны олимпийн наадмын бэлтгэл ажлын хүрээнд Монгол Улсын үндэсний шигшээ багийн багш, дасгалжуулагчдыг тамирчдын хамтаар тус улсад бэлтгэл сургуулилалт базаах боломжоор хангана гэв. БСШУС-ын сайд өмнө нь хэрэгжиж байсан төсөл, хөтөлбөрүүдийг цааш үргэлжлүүлэн хэрэгжүүлэхээ мэдэгдээд хоёр орны цаашдын хамтын ажиллагаанд бодит ахиц гаргахын төлөө хичээж ажиллахаа илэрхийллээ.
Уулзалтад Япон улсын Элчин сайдын яамны нэгдүгээр нарийн бичгийн дарга Фүкасава Хироши, Эдийн засаг хамтын ажиллагааны хэлтсийн ажилтан Б.Цогтчимэг нарын холбогдох албаны хүмүүс байлцав.
Ж.Болор
