Ulaanbaatar
“Тоглоомчид” УДЭТ-ын тайзнаа
МОНГОЛЫН МЭДЭЭ | СОЁЛ УРЛАГ
Улаанбаатар /МОНЦАМЭ/. УДЭТ-ын уран бүтээлчид 2023 оны шинэ уран бүтээлээ үзэгчдэд хүргэх гэж байна. Тус театрын тайзнаа Оросын сонгодог зохиолч Н.В.Гоголийн 1840 онд бичсэн "Тоглоомчид" хэмээх алдарт зохиолыг найруулагч Э.Ёндоншаравын найруулгаар энэ сарын 20-ноос үзэгчдэд толилуулах юм.
Хотын буурчийн газар Ихарев гэх 80 мянган рубль хожсон гарамгай мөрийтэй тоглоомчин ирснээр жүжгийн үйл явдал эхэлнэ. Энэхүү зохиол нь мөрийтэй тоглоомчдын тухай биш, харин хүн чанар хэрхэн сорилтод орж, ёс суртахуун яаж ёроолд унаж буйг гашуунаар харуулсан юм.
Жүжгийн Ерөнхий продюсерээр УГЗ Д.Цэрэнсамбуу, уран сайхны удирдагчаар Монгол Улсын Ардын багш, УГЗ Н.Ганхуяг ажиллаж байгаа бол Б.Шинэбаяр, Н.Ялалт, О.Гэрэлсүх, О.Майдарравжаа, Д.Мөнх-Од, Г.Мөнхжаргал, Ц.Жаргалсайхан, Ц.Рагчаа, Б.Ганзориг, О.Долгор, Т.Анхзул, И.Дашнамжил нарын жүжигчид дүр бүтээжээ.
Ташрамд дурдахад, найруулагч Э.Ёндоншарав УДЭТ-т өмнө нь туслах найруулагчаар ажиллаж байгаад ОХУ-ын Москва хотын Театрын урлагийн их сургуулийг найруулагчийн мэргэжлээр төгсөж ирээд, "Сычуаны сайн хүн", "Шөнө буусан аадар" жүжгийг найруулсан юм.
