Ulaanbaatar
Сэтгэлзүйчид 11-13 насныхан хамгийн их ханджээ
МОНГОЛЫН МЭДЭЭ | БОЛОВСРОЛ
Улаанбаатар /МОНЦАМЭ/. ЕБС-д сэтгэл зүйч ажиллуулж туршихад 11-13 насны сурагчид хамгийн их ханджээ.
Сургуулиуд дэргэдээ сэтгэл зүйч ажиллуулах хүсэлт ихээр ирүүлж байгаа учир БШУЯ-ы төлөөлөл Монголын сэтгэл зүйчдийн нийгэмлэгийнхэнтэй уулзаж санал солилцлоо.
1992
оноос хойш сэтгэл зүйч мэргэжлээр МУИС-ийг 600 орчим оюутан төгсөн гарсан бол
тэдний 50-55 хувь нь өнөөдөр мэргэжлээрээ ажиллаж байна. Харин МУБИС-ийг энэ
мэргэжлээр 2200 орчим оюутан төгсөж тэдний 36 хувь нь мэргэжлийн ажлаа хийж
байна. Гэхдээ сэтгэлзүйч бүр хүүхэдтэй ажиллах боломжгүй учир энэ чиглэлээр
сэтгэл зүйчийг давтан сургах, мэргэшүүлэх асуудал чухал юм.
Монголын
сэтгэл зүйчдийн нийгэмлэгийнхэн сурагчдын дунд хэд хэдэн судалгаа явуулжээ. Судалгааг гарааны болон барианы үнэлгээгээр дүгнэжээ. Мөн сонгосон сургуулиудад сэтгэл зүйч
ажиллуулан үр дүнг тооцсон байна. Эдгээрээс
үзэхэд, 11-13 насныхан сэтгэл зүйчид хандах нь түгээмэл буюу 47 хувьтай
байжээ. Бусад насны сурагчдын 20 хүртэл хувь нь сэтгэл зүйчээс зөвлөгөө авсан
байна. Мөн зөвлөгөө авсан кейсүүдийг ангилж үзвэл 74 хувьд нь гэр бүлийн
шинжтэй ямар нэгэн сэтгэл зүйн дарамт учирсан байжээ. Энэ нь сурагчдын амжилтад
муугаар нөлөөлсөн байв.
Сэтгэл зүйч сурагчидтай ажилласнаар дасан зохицох чадвар нэмэгдэж, эерэг хандлага бий болгон, бэрхшээлийг даван туулах чадварт сургах боломжтой юм. Ингэснээр хүүхдийн сурах идэвх, сурлагын амжилт нэмэгдэнэ. Өнөөдөр сургууль бүрт сэтгэл зүйч ажиллуулах боломж хомс байгаа учир дундын шийдэл олох ажлын баг байгууллаа. Богино, дунд, урт хугацаанд хэрхэн шийдэж болохыг 14 хоногийн дараа дахин ярилцахаар болов.
