Ulaanbaatar
АНУ Европын 4 тэрбум ам.долларын бараа бүтээгдэхүүнд татвар ногдуулж магадгүй
ДЭЛХИЙН МЭДЭЭ | ЭДИЙН ЗАСАГ
ВАШИНГТОН. /CNN/. Нисэх онгоц үйлдвэрлэгч компаниудын татаасын асуудалтай холбоотойгоор АНУ Европын Холбооны /ЕХ/ 4 тэрбум ам.долларын өртөг бүхий бараа бүтээгдэхүүнд татвар ногдуулж магадгүй байна.
АНУ-ын Худалдааны
төлөөлөгчийн газраас мэдээлснээр, шинэ татвар мах, бяслаг, гоймон, жимс, кофе,
виски зэрэг 89 төрлийн бүтээгдэхүүнийг хамрах ба эдгээр нь ЕХ-ны 21 тэрбум
ам.долларын өртөг бүхий экспортын жагсаалтад нэмэгдэх төлөвтэй байна.
АНУ, БНХАУ
худалдааны хэлэлцээр байгуулах талаарх яриа хэлэлцээгээ үргэлжлүүлэхээр
тохиролцсоноос хойш хэдхэн хоногийн дараа дээрх мэдээлэл гарчээ. БНХАУ-ын бараа
бүтээгдэхүүнд шинээр татвар ногдуулахгүй гэж АНУ-ын Ерөнхийлөгч Дональд Трамп өнгөрсөн
бямба гарагт мэдэгдсэн билээ.
Вашингтон болон ЕХ-ны олон жилийн маргаан нисэх онгоц үйлдвэрлэгч “Boeing”, “Airbus” компанийн татаасын асуудлаас үүдэлтэй. “Boeing” холбооны болон муж улсын Засгийн газруудаас 1989-2000 оны эхэн үе хүртэл 19 тэрбум ам.долларын татаас авсан талаар ЕХ-ны эрх баригчид 2004 онд мэдээлсэн бол “Airbus” компани ч мөн татаас авсан талаар АНУ-ын Засгийн газар тухайн үед мэдээлж байв.
АНУ-ын сүүлийн
шийдвэрийн талаар Европын Комиссын хэвлэлийн төлөөлөгч хэлэхдээ, “Boeing” компанитай холбоотой асуудлаар мөн хариу
арга хэмжээ авч магадгүй гэжээ. Мөн тэрбээр, ЕХ АНУ-ын төлөөлөгчидтэй
хэлэлцээ хийхэд бэлэн байгааг онцолсон байна.
