Ulaanbaatar
Хууль бусаар хил нэвтэрсэн хэргүүдэд прокурорын хяналт тавьж байна
МОНГОЛЫН МЭДЭЭ | ХУУЛЬ
Улаанбаатар /МОНЦАМЭ/ Монгол Улсын нэр бүхий иргэд Монгол Улсын хилээр хууль бусаар нэвтрэх талаар урьдчилан үгсэн тохиролцож БНХАУ-ын Эрээн хотоос Дорноговь аймгийн Замын-Үүд сумын Автозамын шалган нэвтрүүлэх боомтоор тээврийн хэрэгсэлд нуугдан орж иржээ.
Улмаар явганаар Монгол Улсын хил нэвтэрсэн үйлдлүүдэд Монгол Улсын Эрүүгийн хуулийн тусгай ангийн 89 дүгээр зүйлийн 89.2 дахь хэсэгт зааснаар эрүүгийн хэрэг үүсгэн шалгаж хоёр этгээдэд холбогдох хэргийг шүүхэд шилжүүлжээ. Мөн гурван этгээдэд холбогдох хоёр эрүүгийн хэрэгт Улсын Ерөнхий прокурорын газраас хяналт тавин ажиллаж байна. Эрүүгийн байцаан шийтгэх хуулийн 190 дүгээр зүйлд заасны дагуу Дорноговь аймгийн Замын-Үүд дэх сум дундын прокурорын газраас Гэмт хэрэг гарах болсон шалтгаан нөхцлийг арилгах, автозамын шалган нэвтрүүлэх боомтын зорчигч, ачаа тээврийн орох, гарах хөдөлгөөнд тавих хяналтыг чангатгах талаар Хил хамгаалах Ерөнхий газрын 0108 дугаар ангид прокурорын мэдэгдэл хүргүүлжээ.
Ж.Батсайхан
