Ulaanbaatar
Япон, АНУ-ын Батлан хамгаалахын сайд нар уулзжээ
ДЭЛХИЙН МЭДЭЭ | УЛС ТӨР
ТОКИО, 2025 оны аравдугаар сарын 29 /Kyodo/. АНУ-ын Батлан хамгаалахын сайд Пит Хегсеттэй лхагва гарагт Токио хотноо анх удаа биечлэн уулзах үеэрээ батлан хамгаалахын зардлаа цаашид нэмэгдүүлэх Японы “шийдвэр”-ийг дамжуулсан гэж Японы Батлан хамгаалахын шинэ сайд Коизүми Шинжиро мэдэгджээ.
Өнгөрсөн долоо хоногт үүрэгт ажилдаа орсон тэрбээр уулзалтын дараа П.Хегсеттэй хамтран хийсэн хэвлэлийн бага хурлын үеэр хэлэхдээ, бид хурдацтай дордож буй аюулгүй байдлын орчны талаар санал солилцсон гэлээ. Мөн Японы Засгийн газар энэ санхүүгийн жилийн эцэс гэхэд батлан хамгаалахын төсвөө ДНБ-ий 2 хувьд хүргэхээр төлөвлөж байгааг П.Хегсетэд уламжилжээ.
Энэ сарын 21-нд Японы анхны эмэгтэй Ерөнхий сайд болсон Такаичи
Санаэ Токиод АНУ-ын Ерөнхийлөгч Дональд Трамптай анх удаа нүүр тулсан дээд
хэмжээний уулзалт хийж, Япон-АНУ-ын харилцааны “шинэ алтан үе”-ийг эхлүүлэхээ
мэдэгдсэнээс хойш нэг хоногийн дараа Батлан хамгаалахын сайд нарын хэлэлцээ боллоо.
Өнөөдөр болсон хамтарсан хэвлэлийн бага хурлын үеэр П.Хегсет
хоёр талын харилцаа холбоо нь Хятадыг тогтоон барихад чухал ач холбогдолтой хэмээн хэлсэн бол К.Шинжиро Японы батлан хамгаалах чадавхыг цаашид бэхжүүлэх нь аливаа
аюул заналхийлэлд хариу өгөх чадварыг сайжруулна гэж мэдэгдсэн
байна.
Япон улс батлан хамгаалах зардлаа нэмэгдүүлэх төлөвлөгөөгөө шуурхай хэрэгжүүлнэ гэж АНУ найдаж байгааг П.Хегсет илэрхийлсний зэрэгцээ уулзалтын үеэр тодорхой дүн хэмжээг дурдаагүй гэдгийг нэмж хэлжээ. К.Шинжиро мэдэгдэхдээ, Хятадын тал цэргийн хүчээ ил тод бусаар өргөн хүрээнд зузаатгаж буйг анхааруулаад, Япон улс “бүс нутагт болж буй үйл явдлуудыг анхааралтай ажиглаж, тайван, шийдэмгий хариу үйлдэл үзүүлэх болно” гэсэн байна.
