Ulaanbaatar
НҮБ-ын Аюулгүйн Зөвлөл Умард Солонгос дахь хүний эрхийн байдлыг хэлэлцэнэ
ДЭЛХИЙН МЭДЭЭ | УЛС ТӨР
ЖЕНЕВ. /NHK/. НҮБ-ын Аюулгүйн Зөвлөл энэ сард БНАСАУ дахь хүний эрхийн байдлыг хэлэлцэхээр төлөвлөж байгаа нь 2017 оноос хойших уг асуудлаарх анхны хуралдаан болох юм.
НҮБ-д суугаа Японы төлөөлөгч Ишикане Кимихиро болон АНУ, БНСУ-ын төлөөлөгчид ирэх пүрэв гарагт уг хуралдааныг хийх хүсэлтээ хүргүүлсэн байна. Энэ тухай өчигдөр болсон хамтарсан хэвлэлийн бага хурлын үеэр мэдэгджээ.
АНУ-аас НҮБ-ын суугаа Байнгын төлөөлөгч Линда Томас-Гринфилд энэ сард Аюулгүйн Зөвлөлийг
даргалж байгаа юм. Тэрбээр хэлэхдээ “Умард Солонгосын дэглэмийн зүгээс өөрийн ард түмэн
болон Япон, БНСУ-ын ард иргэдийн эсрэг үйлдэж буй аймшигт үйлдэл, хүчирхийлэл,
гэмт хэрэгт Аюулгүйн Зөвлөл анхаарлаа хандуулах ёстой” гэжээ.
Дипломатчдын ярьснаар,
НҮБ-ын Хүний эрхийн асуудал эрхэлсэн Дээд комиссарын газар Умард Солонгос дахь хүний
эрхийн байдлын талаар тайлагнах төлөвтэй байна.
НҮБ-ын Аюулгүйн
Зөвлөлийн байнгын гишүүд болох Хятад, Орос хоёр ийм нээлттэй хуралдаан хийхийг
эсэргүүцсээр ирсэн бөгөөд энэ удаад ч мөн эсрэг байр сууриа илэрхийлэх төлөвтэй
байна. Нээлттэй хуралдаан хийхэд Аюулгүйн Зөвлөлийн гишүүн 15 улсын 9-ийнх нь дэмжлэг шаардлагатай байдаг.
