Ulaanbaatar
Усан эргүүлийнхэн багийнхан зургаан настай хүүхдийн амийг аварчээ
МОНГОЛЫН МЭДЭЭ | ХУУЛЬ
Улаанбаатар /МОНЦАМЭ/ ОБЕГ-ын усан эргүүлийн багийн жижүүрийн ажилтнууд наадам, амралтын өдрүүдэд Баянзүрх дүүргийн амралт зугаалгын бүс болох 20 дугаар хорооны нутаг Минж үржүүлгийн газраас Маршлын гүүр хүртэл Туул голын эрэг дагуу нийт 500 гаруй автомашин бүхий 1230 иргэнийг болзошгүй үер усны аюулд өртөхөөс урьдчилан сэргийлж, төөрсөн хоёр хүүхдийг олж гэр бүлд нь хүлээлгэн өгсөн байна.
Мөн дүүргийн 8 дугаар хороо, Эрдэнэ толгойн 4 дүгээр гудамж, үерийн ус зайлуулах далд хоолойд хүүхэд унасан гэсэн дуудлагаар Нийслэлийн аврах анги 105, дүүргийн Онцгой байдлын хэлтэс ажиллаж 6 настай эрэгтэй хүүхдийн амь насыг аварсан байна. Албаны өндөржүүлсэн бэлэн байдлын үеэр Нийслэлийн Онцгой байдлын газрын дэд дарга, хошууч Б.Мягмардорж дүүргийн Онцгой комиссын Үер, усны аюулын үед ажиллах ажлын хэсэгт “Яаралтай цуглар” дохио өгсөн. Дохионы дагуу комиссын бүрэлдэхүүн 82.3 хувийн ирцтэйгээр цугларсан байна. Ажлын хэсгийн ахлагч Засаг даргын орлогч Т.Батцогт ажлын хэсгийн бүрэлдэхүүнд үер усны аюулын үед бэлэн байдлаа ханган ажиллах талаар үүрэг чиглэлийг өгч ажиллалаа гэж НОБГ-аас мэдээллээ.
Ж.Батсайхан
