Ulaanbaatar
Цэцэрлэгт хүрээлэнгийн баримлуудыг эвдсэн этгээдийг олж, нөхөн төлүүлнэ гэв
МОНГОЛЫН МЭДЭЭ | ХУУЛЬ
Улаанбаатар /МОНЦАМЭ/ Нийслэлийн Хан-Уул дүүрэг дэх 120 мянгатын автобусны буудлын баруун талд энэ сарын эхээр нээсэн “Шинэ Хан-Уул” цэцэрлэгт хүрээлэнгийн баримлуудыг эвдэн, сүйтгэжээ. Уг цэцэрлэгт хүрээлэнд 41 төрлийн 200 гаруй ан амьтдын баримал, усан оргилуур, хүрхрээ, дугуйн болон тэшүүрийн зам, хүүхдийн тоглоомын талбайтай байв. Ан амьтдын баримлыг бороо болон наранд өнгөө алддаггүй нийлэг пластик материалаар хийсэн байна. Гэвч баяр наадмын өдрүүдэд 5-6 амьтдын баримлыг эвдэлж бяцалсан байна.
Ихэвчлэн туулай, шувууны баримлуудыг гэмтээжээ. Хан-Уул дүүргийн хуулийн зөвлөх В.Мөнх-Эрдэнэ “Баяр наадмын үеэр 6-7 баримлын чих, сүүлийг эвдэлсэн хэрэг гарлаа. Хүмүүс үнэхээр ухамсаргүй. Хүүхдүүдээ хашлага давуулж оруулж тоглуулаад баримлууд дээр суулгадаг. Суулгаж болохгүй хэмээн цэцэрлэгт хүрээлэнд хяналт тавьдаг ажилтнууд шаардлага тавихаар элдвээр хэлдэг. Мөн жаахан хүүхдүүд туулай, шувуу зэрэг амьтдын баримал руу чулуу шидэж хагалсан бололтой. Урд нь том хэмжээний баримал болох анааш, бар зэргийг хулгайлах гэж оролдоод үйлдэл дээрээ баригдсан тохиолдол ч бий. Аргаа барахдаа харж хандах хүн томилсон ч үр дүнгээ өгсөнгүй. Уг нь цэцэрлэгт хүрээлэнд 24 цагийн бичлэг хийдэг 8-10 камер суурилуулсан. Шөнийн цагаар баримлуудыг сүйтгэсэн учраас буруутай этгээдүүдийн царайг тодруулж чадахгүй байгаа. Цаашид хохирлын хэмжээг тогтоолгоод иргэдээр хохирлыг төлүүлнэ” гэв.
Эвдсэн тагтаа, туулай 40-50 мянган төгрөг, анааш, бар 450 мянган төгрөгийн үнэлгээтэй юм байна.
Ж.Батсайхан
Связанные новости
