Ulaanbaatar
13 настай охиныг хөнөөсөн Б.Жавхлан, М.Амарболд нарын хэргийг дахин мөрдөн байцаалтад буцаав
МОНГОЛЫН МЭДЭЭ | ХУУЛЬ
Улаанбаатар МОНЦАМЭ/. Нийслэлийн Баянзүрх дүүргийн Эрүүгийн хэргийн анхан шатны шүүх Эрүүгийн хэрэг хянан шийдвэрлэх тухай хуулийн 33.3 дугаар зүйлийн 1.2-д “шүүх хуралдаанаар нөхөн гүйцэтгэх боломжгүй мөрдөн шалгах ажиллагааг хийлгэх” гэх үндэслэлээр Б.Жавхлан, М. Амарболд нарт холбогдох эрүүгийн хэргийг мөрдөн шалгах ажиллагаа хийлгэхээр прокурорт буцаажээ. Энэ хэргийн шүүх хурал өнөөдөр тус шүүхэд боллоо. Шүүгдэгч нар хохирогчид архи уулган согтоож, согтуурсны улмаас биеэ хамгаалах чадваргүй байгааг далимдуулан хурьцал үйлдсэн, улмаар хохирогч нь архины цочмог хордлогын улмаас нас барсан нь баримтаар тогтоогдсон. Шүүх хуралд амь насаа алдсан 13 настай охины эцгийг хохирогчоор оруулсан бөгөөд хохирогч охины ээж, эмээ, өвөө, хохирогчийг өмөөрсөн "Лантуун дохио" ТББ-ын төлөөлөл, иргэд шүүхийн гадна жагссан юм. Гэвч шүүх "Шүүгдэгч нарыг хохирогч архины цочмог хордлогын улмаас амь нас хохирсонд гэм буруутай эсэх талаар мөрдөн шалгах ажиллагаа явуулаагүй, тэдний үйлдлийг Эрүүгийн хуулийн зохих зүйл, хэсгээр зүйлчлэн ирүүлээгүй тул мөрдөн шалгах ажиллагаа хийлгэхээр шүүх хэргийг буцаасан" шийдвэр гаргав хэмээн Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхийн Тамгын газраас мэдээллээ.
Ж.Батсайхан
