Ulaanbaatar
“Аюулгүй, гамшигт тэсвэртэй хот” санаачилгад 19 аймаг нэгдэнэ
МОНГОЛЫН МЭДЭЭ | ХУУЛЬ
Улаанбаатар /МОНЦАМЭ/. “Аюулгүй, гамшигт тэсвэртэй хот” олон улсын санаачилгад энэ жил 19 аймгийн төв нэгдэн орохоор бэлтгэл ажлаа хангажээ.
Орон нутгийн түвшинд гамшгийн эрсдлийн талаарх ойлголтыг нэмэгдүүлэх, гамшигтай тэмцэх чадавхийг сайжруулах үйл ажиллагааг дэмжих замаар хот суурин газрын тогтвортой хөгжилд дэмжлэг үзүүлэх зорилгоор 2010 онд ХБНГУ-д эхлүүлсэн НҮБ-ын Гамшгийн эрсдлийн 3828 хот нэгдэн ороод буй. Уг санаачилгад манай улс 2016 онд нэгдэн орсон бөгөөд өнөөдрийн байдлаар Улаанбаатар, Дархан, Эрдэнэт хот нэгдэн, дэлхийн бусад орнуудтай харилцан туршлагаа солилцож, аюулгүй хот бий болгох зорилт тавин ажиллаж байна.
Зорилтын хүрээнд Шадар сайдын ажлын алба, Онцгой байдлын ерөнхий газар, НҮБ-ын гамшгийн эрсдэлийг бууруулах газрын Зүүн хойд Азийн бүсийн төв, Гамшгийн эрсдлийг бууруулах дэлхийн боловсрол, сургалтын хүрээлэнтэй хамтран хоёр жилийн өмнөөс таван удаагийн цуврал сургалтыг зохион байгуулсан. Сургалтыг Өмнөговь, Дархан-Уул, Булган аймаг, Улаанбаатар гэсэн бүсчилсэн хэлбэрээр зохион байгуулж, дээрх бүсийн 16 аймгийн Засаг даргын тамгын газар болон Онцгой байдлын байгууллагын холбогдох алба хаагчдыг хамруулжээ.
Б.Туул
