Ulaanbaatar
Энхийг сахиулах ажиллагаанд онцгой байдлын 15 алба хаагч үүрэг гүйцэтгэнэ
МОНГОЛЫН МЭДЭЭ | УЛС ТӨР
Улаанбаатар, 2025 оны наймдугаар сарын 30 /МОНЦАМЭ/. Бүгд Найрамдах Өмнөд Судан Улс дахь НҮБ-ын энхийг сахиулах “UNMISS” ажиллагаанд Монгол Улсын Зэвсэгт хүчний XV мотобуудлагын батальонд Онцгой байдлын байгууллагын 15 алба хаагч үүрэг гүйцэтгэхтэй холбогдуулан алба хаагчдыг үдэн гаргах ёслол өчигдөр боллоо.
ОБЕГ-ын дарга, хошууч генерал Г.Ариунбуян “Онцгой байдлын
байгууллагын алба хаагчид дэлхийн энх тайвныг тогтоох их үйлсэд 2012 оноос хойш
үүрэг гүйцэтгэж байна. Үе, үеийн энхийг сахиулагчдын алдар нэр, байгуулсан
гавьяа өнөөдрийн амжилтыг бий болгосон юм. Тиймээс та бүхэн албаныхаа болоод эх
орныхоо нэрийг өндөр өргөж, хүлээсэн үүргээ нэр төртэй биелүүлээд ирээрэй” хэмээн онцлов.
Энэ үеэр XV ээлжийн бүрэлдэхүүний ахлагч Баян-Өлгий
аймгийн Онцгой байдлын газрын Цэнгэл сум дахь Гал түймэр унтраах, аврах 71
дүгээр ангийн Гал түймрийн улсын хяналтын байцаагч, дэд хурандаа Т.Өнөрбекд
Онцгой байдлын байгууллагын тугийг хүлээлгэн өгч, үүрэг гүйцэтгэх алба хаагчдад
шаардагдах хувцас хэрэгслийг гардууллаа.
Тус 15 алба хаагч нь төв, орон нутгийн Онцгой байдлын газар, хэлтсийн 2 офицер, 13 ахлагчаас бүрдсэн аж.
