Ulaanbaatar
Өмнөд Солонгосын ерөнхийлөгчид нэр дэвшигчдийн дунд сүүлчийн мэтгэлцээн болжээ
ДЭЛХИЙН МЭДЭЭ | УЛС ТӨР
СӨҮЛ, 2025 оны тавдугаар сарын 28 /Yonhap/. Өмнөд Солонгосын ерөнхийлөгчийн сонгууль болоход ердөө долоо хоногийн хугацаа үлдээд буй энэ үед дөрвөн нэр дэвшигч дипломат бодлого, улс төрийн шинэчлэлийн асуудлаар мэтгэлцжээ. Телевизийн сүүлчийн мэтгэлцээний үеэр тэд Өмнөд Солонгос-АНУ-ын харилцаанаас эхлээд Ерөнхийлөгч асан Юн Сог Ёлийн импичмент зэрэг асуудлуудыг хөндөн мэтгэлцсэн байна.
Орон нутгийн
цагаар мягмар гаргийн 20:00
цагт эхэлсэн Сонгуулийн үндэсний хорооноос зохион байгуулсан мэтгэлцээнд Ардчилсан намаас /АН/ Ли Жэ
Мён, Ардчилсан Хөдөлмөрийн намаас Квон Ён Күк, “Ардын хүч” намаас /АХН/ Ким Мүн
Сү, Шинэ шинэчлэлийн намаас Ли Жүн Сок нар оролцлоо.
АН-аас нэр дэвшиж
буй Ли Жэ Мён Өмнөд
Солонгос-АНУ-ын харилцаанд тулгуурласан Өмнөд Солонгосын дипломат бодлогыг “прагматик, иж бүрэн, ирээдүйг
харсан” чиглэлд ахиулахын сацуу Японтой аюулгүй байдлын салбар дахь хамтын ажиллагааг улам гүнзгийрүүлэхээ амлажээ. Солонгосын хойгт энх тайван, тогтвортой байдлыг тогтоохыг эрмэлзэхийн зэрэгцээ
Хятад, Оростой харилцаагаа зохицуулах хэрэгтэйг Ли Жэ Мён онцолсон байна.
Харин АХН-ын нэр дэвшигч Ким Мүн Сүгийн хувьд, Умард Солонгостой харилцахдаа илүү хатуу чиг шугам баримтлахыг санал болгож, Ким Жөн Уны дэглэм цөмийн болон пуужингийн өдөөн хатгасан шинжтэй үйлдлүүдээрээ ард түмний амь нас, эд хөрөнгөд заналхийлж байна хэмээн шүүмжилсэн байна. “Би Солонгос хоорондын ил тод харилцааг бий болгоно” гэж тэрбээр хэлээд, Өмнөд Солонгос-АНУ-ын эвслийн тусламжтайгаар цөмийн зэвсгийг тогтоон барих чадавхийг бэхжүүлж, аливаа аюул заналхийллийн эсрэг тууштай зогсож чадах улс орныг бий болгоно гэж амлажээ.
Шинэ шинэчлэлийн намын нэр дэвшигч Ли Жүн Сок хэлэхдээ, Гадаад хэргийн яам, Үндэстнээ нэгтгэх яамыг нэгтгэж, аюулгүй байдлын бодлогыг хянадаг Ерөнхий сайдын орлогчийн албан тушаалыг шинээр бий болгохыг санал болгожээ. Тэрбээр мөн АНУ-аас тавьсан батлан хамгаалах зардлаа нэмэгдүүлэх хүсэлтийн хариуд Өмнөд Солонгос-АНУ-ын хамтарсан пуужингийн үйлдвэрийг барихыг санал болгосон байна. Харин Ардчилсан Хөдөлмөрийн намын гишүүн Квон Ён Күкийн хувьд, Батлан хамгаалахын сайдаар энгийн иргэнийг томилох замаар цэргийн салбарт шинэчлэл хийж, Солонгосын хойгт энх тайван тогтоохын төлөө идэвхтэй ажиллахыг чухалчилжээ.
