Ulaanbaatar
АНУ Тайваньд 345 сая ам.долларын цэргийн тусламж үзүүлнэ
ДЭЛХИЙН МЭДЭЭ | УЛС ТӨР
ВАШИНГТОН. /ABC/. АНУ-ын Ерөнхийлөгч Жо Байден Тайванийн батлан хамгаалах салбарт 345 сая ам.долларын тусламж үзүүлэхийг үүрэг болгосон тухай Цагаан ордон мэдээлжээ.
“АНУ-ын Үндсэн хууль, хуулиар надад олгосон Ерөнхийлөгчийн эрх мэдлийн хүрээнд би Төрийн нарийн бичгийн даргад Тайваньд тусламж үзүүлэх зорилгоор Пентагоны батлан хамгаалахын бүтээгдэхүүн, үйлчилгээнд, мөн цэргүүдийг сургах, бэлтгэхэд зориулж 345 сая ам.доллар хуваарилахыг үүрэг болгож байна” гэж Ж.Байдены мэдэгдэлд дурдсан байна.
"АВС" телевизээр эх сурвалжуудаас эш татан мэдээлснээр, цэргийн тусламжийг АНУ-ын Батлан хамгаалах яамны нөөцөөс гаргах бөгөөд багцад зөөврийн зенитийн пуужингийн цогцолбор, галт зэвсэг, пуужин, тагнуул, ажиглалтын тоног төхөөрөмж багтах аж.
