Ulaanbaatar
"Дорнын эдийн засгийн форум-2021"-оор Монгол-Оросын харилцааны түүхэн чиг хандлагыг хөндөнө
МОНГОЛЫН МЭДЭЭ | УЛС ТӨР
Улаанбаатар /МОНЦАМЭ/. "Дорнын эдийн засгийн форум"-ын ээлжит VI чуулган ОХУ-ын Владивосток хотноо ирэх сарын 2-4-нд уламжлал ёсоор болох нь. Зургаа дахь удаагийн чуулганаар дэлхий нийтийг хамарсан КОВИД-19-ийн халдварын цар тахлын үр дагаврыг даван туулах, шийдэх гарцын талаар “Шинэ эрин үеийн эдийн засаг: Юу өөрчлөгдөж, юу үлдэх вэ”, “Алс Дорнод-шинэ сорилт боломжууд”, ”Өөрчлөгдсөн дэлхийд хамтын хариуцлага”, “Залуучуудын Алс Дорнын эдийн засгийн форум” гэсэн үндсэн 4 чиглэлээр хэлэлцэх аж. Мөн энэ удаагийн чуулганы хүрээнд энэ онд тохиож буй Монгол Улс, ОХУ хоёр улсын хооронд дипломат харилцаа байгуулж тогтоосны 100 жилийн ойтой холбогдуулж “Орос-Монголын харилцааны түүхэн ба орчин үеийн чиг хандлага-100 жилийн ой” эрдэм шинжилгээний бага хурал болж хоёр орны түүхэн харилцааг өгүүлсэн үзэсгэлэнг дэлгэх талаар ОХУ-ын хэвлэлүүд мэдээлж байна.
Чуулганаар ОХУ-ын болон гадаад улсуудын томоохон компанийн төлөөлөгчдийн хооронд бизнесийн уулзалт зохион байгуулахаас гадна Ази, Номхон далайн эдийн засгийн хамтын ажиллагааны форумын бага хурал, Их Евразийн түншлэл байгуулах тухай хэлэлцүүлгийг өрнүүлэх юм.
