Ulaanbaatar
Ши Жиньпин: Хятадын арми дэлхийн хүчирхэг армиудын нэг болох ёстой
ДЭЛХИЙН МЭДЭЭ | УЛС ТӨР
БЭЭЖИН. /Xinhua/. Хятадын эрх баригчид БНХАУ-ын үндэсний эрх ашгийг хамгаалахын тулд Хятадын Ардын чөлөөлөх армийг /ХАЧА/ дэлхийн хамгийн хүчирхэг Зэвсэгт хүчнүүдийн нэг болгох ёстой гэж тус улсын дарга Ши Жиньпин мэдэгдлээ.
"ХАЧА нь улс орны бүрэн эрхт байдал, аюулгүй байдал, хөгжлийн ашиг сонирхлыг найдвартай хамгаалах чадвартай байхын тулд бүр илүү өндөр чадвартай дэлхийн түвшний Зэвсэгт хүчин болох ёстой" гэж Ши Жиньпин Хятадын Коммунист нам байгуулагдсаны 100 жилийн ойд зориулсан баяр ёслолын арга хэмжээний үеэр хэллээ.
"Өнгөрсөн үеэс сургамж авч, ирээдүйгээ хамгаалахын тулд үндэсний батлан хамгаалалт, Зэвсэгт хүчний шинэчлэлийг түргэтгэх шаардлагатай байна. Хүчирхэг улс хүчтэй армитай байх ёстой. Зөвхөн хүчирхэг Зэвсэгт хүчин л үндэсний аюулгүй байдлыг хангаж чадна" гэж тэрбээр нэмж хэлэв.
Хятадын эрх баригчид Зэвсэгт хүчний томоохон шинэчлэлийг 2015 оны сүүлчээр эхлүүлсэн бөгөөд үүнийг гадаад, дотоодын мэргэжилтнүүд ХАЧА-ийн түүхэн дэх "эрс шинэчлэлт" гэж нэрлэжээ.
БНХАУ-ын даргын хэлснээр, Хятад улс бусад орны эерэг туршлагыг хүлээн авах боловч өөрт хаягласан "ихэрхэг сургаалыг" хүлээж авахгүй.
"Бид бусад соёлын ололт амжилтаас суралцаж, ашигтай санал, сайн санаа өвөрлөсөн шүүмжлэлийг хүлээж авахыг хүсэж байна. Харин бид өөрсдийгөө зөвлөгч гэж төсөөлдөг хүмүүсийн ихэрхүү сургаалаас татгалзаж байна" гэж тэрбээр хэлсэн байна.
"Хятадын Коммунист нам, Хятадын ард түмэн өөрсдийн сонгосон замаар итгэл төгс алхаж, Хятад улсын хөгжил дэвшлийн төлөө хувь заяагаа гартаа чанга атгана" гэж БНХАУ-ын дарга нэмж хэлжээ.
Пүрэв гарагт Хятадын Засгийн газар Бээжин хотын төвд байрлах Тяньаньмэний талбайд Коммунист нам байгуулагдсаны 100 жилийн ойг тэмдэглэн өнгөрүүлэх томоохон арга хэмжээ зохион байгуулжээ. Уг арга хэмжээнд 70 мянга орчим хүн оролцсон байна.
