Ulaanbaatar
“Монгол орны хөгжилд” XVI чуулга уулзалт болов
МОНГОЛЫН МЭДЭЭ | ГХЯ-НЫ МЭДЭЭ
Улаанбаатар /МОНЦАМЭ/. Британи дахь Монголчуудын холбоо, Монгол Улсаас ИБУИНХУ-д суугаа ЭСЯ болон МУИС-тай хамтран хилийн чанад дахь Монголчуудын эх орныхоо хөгжил дэвшилд хувь нэмрээ оруулах зорилготой “Монгол орны хөгжилд” XVI чуулга уулзалтыг энэ сарын 5–6-нд цахимаар зохион байгуулав.
Чуулга уулзалтад Монгол, Австрали, Англи, АНУ, Герман, Швед, Өмнөд Солонгос, Бельги, Ирланд, Итали, Польш, Унгар, Япон зэрэг орнуудад оршин суугаа 300 орчим иргэд идэвхтэй оролцож, “Соёлын бүтээлч үйлдвэрлэл ба тогтвортой хөгжил”, “Уул уурхай ба тогтвортой хөгжил”, “Дээд боловсрол ба тогтвортой хөгжил” гэсэн 3 сэдвээр хэлэлцэв.
Гадаад харилцааны сайд Н.Энхтайван чуулга уулзалтад оролцогчдод амжилт хүсэн мэндчилгээ дэвшүүлэв. Тэрбээр хэлсэн үгэндээ хилийн чанадад сурч, ажиллаж, амьдарч буй монгол иргэдэд чиглэсэн төр, засгаас хэрэгжүүлж буй бодлого, арга хэмжээний талаар мэдээлэв. Түүнчлэн, “Дэлхийн Монголчууд II” хөтөлбөрийг гаргахаар ажиллаж байгааг танилцуулав.
Монгол Улсаас ИБУИНХУ-д суугаа Элчин сайд Н.Тулга чуулга уулзалтыг нээж үг хэлэхдээ Лондон хотноо энэ оны 5 дугаар сард чуулга уулзалтыг зохион байгуулахаар төлөвлөж байсан ч “COVID-19” цар тахлын улмаас хойшлогдсоор ийнхүү цахимаар болж байгааг дурдав. Мөн 17 зорилго бүхий 2030 он хүртэлх Дэлхийн Тогтвортой хөгжлийн хөтөлбөрийг танилцуулж, манай улсын “Алсын хараа–2050” урт хугацааны бодлого болоод Монгол Улсын Тогтвортой хөгжлийн үзэл баримтлал 2030-д чиглэсэн тогтвортой хөгжлийн зарим асуудлуудыг энэ удаагийн чуулганаар хэлэлцэж байгааг олзуурхан хүлээн авч, сэтгэл ханамжтай байгаагаа илэрхийлэв.
