Ulaanbaatar
“Jeju Air” БНХАУ-ын 6 шинэ чиглэлд нислэг үйлдэнэ
ДЭЛХИЙН МЭДЭЭ | ЭДИЙН ЗАСАГ
СӨҮЛ. /Yonhap/. БНСУ-ын хямд өртөгт агаарын тээврийн компаниудын томоохон төлөөлөгчдийн нэг “Jeju Air” БНХАУ-ын зургаан хотын чиглэлд нислэг үйлдэхээр болсон тухайгаа даваа гарагт мэдэгдсэн байна.
“Манай компани “Инчеон”,
“Бусан”, “Муан” зэрэг гурван нисэх буудлаас Хятадын Харбин, Яньжи, Наньтун,
Жанжяже зэрэг хот руу энэ долоо хоногийн мягмар гарагаас наймдугаар сарын 22
хүртэл нислэг үйлдэхээр төлөвлөж байна” гэж “Jeju Air” компанийн мэдэгдэлд дурджээ.
БНСУ-ын чухал ач холбогдол бүхий материалуудад экспортын хязгаарлалт тавих Японы шийдвэртэй холбогдуулан “Jeju Air” болон БНСУ-ын агаарын тээврийн бусад компани Японы зарим чиглэлд нислэгийн тоогоо бууруулахаар төлөвлөж буй үед энэ үйл явдал болж байна.
Сөүлийн шүүх дайны үеэр албадан хөдөлмөр эрхлүүлсний нөхөн төлбөрийг Солонгосын иргэдэд олгохыг Японы фирмүүдээс шаардсан шийдвэрийг гаргасны хариуд Япон улс энэ сарын эхээр БНСУ-ыг экспортын найдвартай түншүүдийн жагсаалтаас албан ёсоор хасах шийдвэрийг гаргасан юм.
“Jeju Air” компанийн төлөөлөгч өнгөрсөн долоо хоногт мэдэгдэхдээ, Японы чиглэлийн “ашиг багатай” нислэгийн тоог бууруулна хэмээсэн боловч тодорхой чиглэлийн талаар мэдээлэл өгөөгүй байна. Тус агаарын тээврийн компани нь одоогийн байдлаар “B737-800” загварын 45 онгоцтой бөгөөд дотоодын 6 чиглэлд, олон улсын 70 чиглэлд нислэг үйлддэг ажээ.
