Ulaanbaatar
Шри Ланкад болсон цуврал дэлбэрэлтэд 13 орны 30 иргэн амиа алджээ
ДЭЛХИЙН МЭДЭЭ | УЛС ТӨР
ШИНЭ ДЕЛИ. /TASS/. Шри Ланка улсад өнгөрөгч ням гарагт болсон цуврал дэлбэрэлтийн улмаас гадаадын 30 иргэн амиа алдсан тухай тус улсын Гадаад хэргийн яамны албан ёсны цахим хуудсанд мэдээлжээ.
Яамны мэдээлснээр, цуврал халдлагын үеэр Бангладеш, Франц, Япон, Нидерланд, Португал болон Испани улс бүрийн нэг иргэн, БНХАУ, Саудын Араб болон Турк тус бүрийн хоёр иргэн, Энэтхэгийн найман иргэн, Их Британийн зургаан иргэн, мөн Америк болон Их Британийн иргэншилтэй хоёр хүн, Шри Ланка болон Австралийн иргэншилтэй хоёр хүн амиа алдсан байна.
Үүнээс гадна, сураггүй болсон гадаадын өөр 14 иргэний хэн болохыг нь тогтоогоогүй байгаа бөгөөд тэд хохирогчдын дунд байж магадгүй байна. Цуврал халдлагын үеэр гадаадын 17 иргэн шархадсаныг Коломбо хотын эмнэлгүүдэд хүргэгджээ. Амиа алдсан болон шархадсан хүмүүсийн жагсаалтыг дахин нягталж магадгүй байна. Амиа алдсан хүмүүсийн нэг нь Америк болон Германы паспорттой байсан тухай Германы Гадаад хэргийн яам урьд нь мэдээлжээ.
Шри Ланкагийн түүхэн дэх хамгийн том цуврал халдлага дөрөвдүгээр сарын 21-нд болсон билээ. Хамгийн сүүлийн мэдээллээр, цуврал халдлагын улмаас 290 хүн амиа алдаж, 500 орчим хүн шархаджээ. Тус улсын Коломбо, Негомбо болон Баттикалоа хотод нийт найман дэлбэрэлт болсон юм. Цуврал халдлагыг Шри Ланкагаас гаралтай амиа золиослогчид үйлдсэн гэж тус улсын эрх баригчид мэдээлсэн байна.
Цуврал халдлагын ард "Жамаат ат-Таухид аль-Ватания" /“Үндэсний эв нэгдэл”/ бүлэглэл байгаа гэж телевизийн “Al Arabiya” сувгаар мэдээлсэн байна.
