Ulaanbaatar
Маргаантай арлын ойролцоо сургуулилалт хийснийг эсэргүүцэв
ДЭЛХИЙН МЭДЭЭ | УЛС ТӨР
ТОКИО. /Kyodo/. БНСУ газар нутгийн маргаантай байгаа Такэшима /Токто/ арлын бүсэд цэргийн сургууль хийж эхэлсэнтэй холбогдуулан Японы Засгийн газар пүрэв гарагт эсэргүүцлээ илэрхийлсэн байна.
Японы Засгийн газар эсэргүүцлээ дипломат шугамаар мэдэгдсэн байна. Токиогийн хувьд энэ сургуулилалт нь “хүлээн зөвшөөршгүй” учир “нэн даруй зогсоохыг" уг мэдэгдэлд шаарджээ.
БНСУ-ын цэргүүдийн хоёр өдрийн сургуулилалтад хамгийн багадаа найман хөлөг онгоц болон "F-15" сөнөөгч онгоц, "P-3C" эргүүлийн нисэх онгоц зэрэг тус улсын Зэвсэгт хүчний хэд хэдэн нисэх онгоц оролцох аж. БНСУ ийм сургуулилалтыг хамгийн сүүлд зургаадугаар сард хийсэн байна.
Такэшима бүлэг арал нь өмнөд солонгосчуудын Зүүн тэнгис гэж нэрлэдэг Япон тэнгисийн баруун хэсэгт оршдог. Хүн оршин суудаггүй энэ арал 1945 онд Солонгос Японы колоничлолоос чөлөөлөгдсөний дараа олон улсын маргааны сэдэв болжээ. Одоо тус арал жижиг гарнизоноо байрлуулдаг БНСУ-ын Зэвсэгт хүчний хяналтад байдаг аж.
1905 онд Японы эзэнт гүрний бүрэлдэхүүнд орсон энэ газар нутгийг БНСУ хууль бусаар эзлэн авсан гэж Токио мэдэгддэг бол БНСУ болон БНАСАУ-ын эрх баригчид Токто арал нь түүхийн хувьд үргэлж Солонгос улсын бүрэлдэхүүнд байсаар ирсэн гэж мэдэгддэг байна.
