Ulaanbaatar
Олны анхаарал татсан зарим хэргүүдийг шүүхэд шилжүүлэв
МОНГОЛЫН МЭДЭЭ | ХУУЛЬ
Улаанбаатар /МОНЦАМЭ/. Улсын ерөнхий прокурор М.Энх-Амгалангийн мэдэгдэж байсанчлан олны анхаарал татсан зарим хэргүүдийг шүүхэд шилжүүлэв. АН-ыг эрх барьж байх үед Засгийн газрын гишүүнээр ажиллаж байсан Эдийн засгийн хөгжлийн сайд асан Н.Батбаяр, Шадар сайд асан Ц.Оюунбаатар, Эрчим хүчний сайд асан М.Сономпил, УИХ-ын гишүүн асан Б.Гарамгайбаатар нарт холбогдох хэргийг нийслэлийн Прокурорын газраас харьяалах шүүхэд шилжүүлжээ.
Прокуророос Эдийн засгийн хөгжлийн сайд асан Н.Батбаярыг УИХ-ын гишүүн асан Б.Гарамгайбаатарын “Монроуд” компанид давуу эрх олгож, улсад их хэмжээний хохирол учруулсан, Эрчим хүчний сайд асан М.Сономпилийг Амгалан дулааны станцыг өргөтгөсөн Хятадын “Чайна машинери, инженеринг” компанид татварын хөнгөлөлт үзүүлж, улсад хохирол учруулсан, Шадар сайд асан Ц.Оюунбаатарыг хүүгийнхээ төрийн бус байгууллага руу 150 сая төгрөг шилжүүлсэн зэрэг хэрэгт холбогдуулан, яллах дүгнэлт үйлдүүлэхээр шүүхэд шилжүүлсэн байна.
